Qırımtatarlar çarşenbe künü, iyünniñ 26-nda, Milliy bayraq kününi qayd ete.
Qırımda, esas Ukrainada ve dünyanıñ diger memleketlerinde bayram tedbirleriniñ keçirilmesi planlaştırıla.
Kyivde sergi açılışı, avtoyürüş, bala resimleri yarışı, spikerlerniñ çıqışları, Hreşçatıkta tantanalı yürüş, Mustaqillik Meydanında miting ve diger tedbirler olacaq. Paytahtta olacaq merasimlerniñ tolu cedveli mında bar.
Qırımda işğalci Rusiye akimiyeti ve mustaqil qırımtatar faalleriniñ tedbirleri keçirilecek.
Daa evel haber etilgeni kibi, Rusiye kontrolindeki Aqmescit rayonınıñ prokuraturası qırımtatar faali Nariman Celâlnı Qırımtatar bayraq künü arfesinde «ekstremist faaliyeti» aqqında tenbiledi.
İyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın renkli tamğa tasvir etilgen kök renkli bir bayraqtır.
