Bağçasarayda Qırımtatar Milliy Qurultayınıñ delegatı Edem Dudakovnıñ davası baqılğan Bağçasaray rayon mahkemesiniñ binası ögünde bir kün evelsi tutulğan qırımtatar faallerine qarşı idariy protokollar boyunca mahkeme oturışuvları başlandı.
«Qırım birdemligi» cemaat birleşmesi bildirgenine köre, mahkeme oturışuvı keç başlandı, sebebi belli degil.
Rusiye uquq qoruyıcıları tünevin 15 faalni tuttı.
«Qırımtatarlarğa qarşı Rusiye Federatsiyasınıñ İdariy uquq bozuvları kodeksiniñ 20.2.2 maddesine (birinci qısmı) istinaden protokollar tizildi. «Cemaat nizamınıñ bozuluvına sebep olğan cemmaat yerlerinde vatandaşlarnıñ aynı vaqıtta kütleviy bulunuvı ve (ya da) areket etüvini teşkil etüv». Amethan Umerovğa qarşı Rusiye Federatsiyasınıñ İdariy uquq bozuvları kodeksiniñ 20.2.2 maddesine (ekinci qısmı) istinaden protokol tizildi – 30 künge qadar idariy apis cezası berile bile», – dep aytıla haberde.
«Qırım birdemligi» qayd etkenine köre, tünevin aqşam 67 yaşında Zodiye Saliyeva, 79 yaşında Gani Abdulganiyev, 74 yaşında Riza Nuradinov polis bölüginden çıqtı. Qalğanları idariy ceza alğanlar içün kameralarda geceledi.
Fevralniñ 18-nde Rusiye kontrolindeki Bağçasaray rayon mahkemesi Dudakovnı 10 künge idariy apiske aldı. Onı 2017 senesi içtimaiy ağlarda yazğan izaatı sebebinden milletlerara zıddiyet çıqarğanında qabaatladılar.
Tintüv aqqında Qırımtatar Milliy Meclisiniñ reisi Refat Çubarov bildirdi. Onıñ aytqanına köre, «Dudakov – Bağçasasaraydaki Han sarayınıñ rus işğalcileri tarafından yoq etilüvi aqqında qorqmayıp aytqanlardan biridir». Faallerniñ bildirgenine köre, tintüv Ekstremizm ile küreş merkeziniñ hadimleri tarafından keçirile, Dudakovnı ise kelgen advokatlarınen körüştirmeyler.
Edem Dudakov – qırımtatar faali, Qırımtatar Milliy Qurultayınıñ deleşatı ve Milletlerara munasebetler işleri komitetiniñ sabıq reisi. Qırım Rusiye tarafından işğal etilgen soñ, Dudakov «Han sarayınıñ imayecisi» oldı. Faallerniñ aytqanına köre, Rusiye keçirgen «restavratsiya» neticesinde binanıñ autentik elementleri yoq ola, binalarnıñ özü bozula.
