Kremlniñ sabıq siyasiy mabüsleri cumaaqşamı künü, oktâbr 17-sinde ğarbiy memleketlerniñ elçilerinen körüşti. Bunı "Kreml siyasiy mabüsleri tuvğanlarınıñ birleşmesi" teşebbüsiniñ başı İğor Kotelânets Facebookta haber etti.
Büyük Britaniyanıñ Ukraina elçiliginde keçken körüşüvde, hususan, Volodımır Baluh, Edem Bekirov, Yevğen Panov, Roman Suşçenko, Andriy Sızonovıç, Mıkola Karpük, Artur Panov iştirak etti. Ve apisteki ukrainlerge qol tutqan yigirmige qadar memleketniñ elçileri.
"Qısqadan öz ikâyelerimizni tarif ettik. Ve Rusiyege qarşı basqını toqtatmamağa, onıñ türmelerinde olğan yigitlerimizge destek köstermege elçilerge muracaat ettik. Men, Rusiye işğal etken topraqlarımız olğance, bu toqtamacaq, dep ayttım. O devletniñ siyaseti buña esaslana, dep qayd ettim. Öz vatandaşlarına da munasebetleri aynıdır... Olar esir alıp, olarnen alış-veriş yapa... Men hususan Oleğ Prıhodko ve Oleksand Şumkov aqqında ayta edim, o şimdi açlıq tuta", - dep, Qırım.Aqiqatqa tefsir berip, ikâye etti Volodımır Baluh.
2017 senesiniñ soñunda haber etile edi ki, Yuqarı Rada mebusı Dmıtro Yaroşnıñ sabıq qaravulı Oleksandr Şumkov Rusiye SİZOsına tüşti. O "Pravıy sektor" teşkilâtınıñ faaliyetinde iştiraginde qabaatlana.
Ukraina tarafdarı olğan faal Oleğ Prihodkonıñ tutulğanı aqqında oktâbrniñ 10-nda saba belli oldı.
FSB hadimleri Rusiye Ceza kodeksiniñ 223.1 (patlayıcı maddelerni qanunsız azırlanması) ve 205 (terror ücümi) maddelerine istinaden qabaatlay. Keççe o, Saq şeer memuriyeti binasını patlatmağa azırlağanında qabaatlandı.
