İşğal etilgen Qırımda Ukraina tarafdarı saqlı faal Oleg Prihodko tutuldı. Bu aqta kezlevli ukrain faali, yedinci çağırılış Ukraina halq deputatı Eduard Leonov Qırım.Aqiqatqa bildirdi.
«Bunı Oleg Prihodkonıñ qızı haber etti. Çarşenbe aqşamı evini sürip kirgenler ve babasını FSBge alıp ketkenler, dep ayttı. Olğan urbada alıp ketkenler. Sebep belli degil, ne tuvğanları, ne men alâ daa bir şey bilmeymiz», – dedi Leonov.
Rusiye quvet ve uquq qoruyıcı müessiseleriniñ bir de bir izaatı şimdilik yoq. Qırım.Aqiqat tafsilâtlı malümat almağa tırışa.
2019 senesi fevralniñ 8-nde Qırımdaki FSB idaresiniñ hadimleri Saq rayonınıñ Orehovo köyünde Oleg Prihodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler.
Rusiye quvetçileri Prihodkonıñ evinde keçirilgen tintüvni izaatlamadı. 2016 senesi iyün ayında Rusiye quvetçileri faalni maşinasındaki ukrain nomeraları içün tutqan edi.
