Link açıqlığı

Saatnıñ esas haberi

Qırımda tutulğan Prihodko memuriyet binasını patlatmağa azırlağanında qabaatlaylar – advokat


Oleg Prihodko
Oleg Prihodko

İşğal etilgen Qırımda tutulğan Ukraina tarafdarı faal Oleg Prihodko Saq şeer memuriyeti binasını patlatmağa azırlağanında qabaatlana. Bu aqta FSB binasında faalnen laf etken advokat Nazim Şeihmambetov Qırım.Aqiqat mühbirine bildirdi.

«Tünevin aqşam Oleg Arkadyeviçniñ (Prihodko – QA) evinde garajı baqıldı. Garajda FSB hadimleri 200-ünci çeşit trotil dama taşı, UZRGM-2 içün fişenk ve zarar ketirici şeyler, hususan kesilgen qaynaq elektrodlarını taptı. Prihodko Saq şeeri memuriyetiniñ binasını patlatmağa azırlağanında qabaatlaylar. Amma, tahqiqatçınıñ fikirince, o, işini bitiremedi, çünki FSB hadimleri onı tutıp, terror ücüminiñ ögüni alğan eken», – dedi advokat.

Prihodkonıñ Özü oña qarşı dava sahte ve patlayıcı oña gizliden qoyuldı, dep israr ete.

«Oleg Arkadyeviç olıp keçkenlerni Ukrainağa qoltutqanı içün siyasiy taqip olaraq tanıy».

Subet vaqtında Nazim Şeihmambetov faalniñ tünevinden berli aşamağanını ögrendi: «Tünevinden berli aşatmadılar, suv ve bulka bermege bile bermeyler. Tünevin hadimlerden biri sigar berdi. Qorqqanımızğa baqmadan, Oleg Arkadyeviçni kerçekten köteklemediler ve oña qarşı küç qullanmadılar».

Advokatnıñ malümatına köre, bugün mahkeme faalniñ sıñırlav tedbirini belgileycek.

Qırım akimiyetine yaqın olğan Krıminform saytı FSB idaresiniñ malümatına esaslanıp, oktâbrniñ 10-nda «Qırımda memuriy binanı patlatacaq olğan Rusiye vatandaşı tutuldı», dep bildire. Müessise ad ve soaydını aytmay.

Prihodkonıñ tutulğanını oktâbrniñ 10-nda saba kezlevli ukrain faali, yedinci çağırılış Ukraina halq deputatı Eduard Leonov haber etti. Faalniñ ömür arqadaşı Lübov Prihodko da tutulğan edi.

FSB hadimleri Rusiye Ceza kodeksiniñ 223.1 (patlayıcı maddelerni qanunsız azırlanması) ve 205 (terror ücümi) maddelerine istinaden qabaatlay.

2019 senesi fevralniñ 8-nde Qırımdaki FSB idaresiniñ hadimleri Saq rayonınıñ Orehovo köyünde Oleg Prihodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler. Rusiye quvetçileri Prihodkonıñ evinde keçirilgen tintüvni izaatlamadı. 2016 senesi iyün ayında Rusiye quvetçileri faalni maşinasındaki ukrain nomeraları içün tutqan edi.

XS
SM
MD
LG