Avropa Birligi Rusiyeniñ işğal etilgen Qırımda ve Aqyarda ealini cedvelge almaq qararını takbih etti, dep aytıla Avropa tış işler hızmetiniñ oktâbrniñ 15-nde aydınlatılğan beyanatında.
AB, Rusiye akimiyetiniñ yarımada keçirgen daa bir askerlikke aluv kampaniyasını da takbih ete.
«AB, Rusiye Federatsiyasınıñ qanunsız işğal etilgen Ukraina Qırımı ve Aqyarınıñ ealisini oktâbrniñ 15-nden noyabrniñ 14-ne qadar cedvege almaq ve oktâbrniñ 1-nde daa bir askerlikke aluv kampaniyasını başlatmaq qararını takbih ete», – dep aytıla AB Tış işler hızmetiniñ vekili Piter Stanonıñ beyanatında.
Hızmet, Moskvanıñ areketlerini «Qırımnıñ qanunsız ilhaqını qanunlaştırmaq ve halqara seviyede tanılğan sıñırlarında Ukraina suvereniteti ve topraq bütünligini bozmaq ıntıluvı» dep saya.
Avropa Birligi, Rusiyeni Qırımda halqara ve gumanitar uquqnıñ bozuluvını toqtatmasına çağırdı. Beyanatqa köre, blok avgustnıñ 23-nde olıp keçken «Qıpım platformasınıñ» sammiti neticelerine köre «Rusiyeniñ qanunsız yarımada işğalini barışıq yolunen toqtatuv işini devam ettirmege» planlaştıra.
Bundan evel Ukraina Tış işler nazirligi Qırım ve Aqyarda ealiniñ cedvelge alınmasına qarşı narazılıq bildirdi. Rusiye tarafı Ukraina ve Avropa Birliginiñ beyanatlarına daa cevap bermedi.
Rusiye Mudafaa nazirligi bildirgenine köre, Qırımda ve Aqyarda arbiyler yerlilerni Rusiye Silâlı quvetleriniñ bölüklerine yollap başladı.
Rusiyede oktâbrniñ 15-nden noyabrniñ 14-ne qadar eali cedvelge alınacaq. Sakinler aqqında malümat Qırımda da toplanacaq. Yarımada sakinlerini rusiyeliler 2014 senesi de cedvelge alğan edi, o vaqıt Qırımda milliy terkipniñ deñişmeleri qayd etildi.
Rusiyeniñ 2014 senesi Qırımda keçirgen cedvelge aluv malümatına köre, cedvelge alınğan Qırım ealisi 1,89 million kişi, Aqyar ealisi ise 393 biñ insan oldı.
Ukraina akimiyeti bu raqamlarğa esaslanıp, Rusiyeni vaqtınca işğal etken yarımadağa vatandaşlarını ketire, dep qabaatlay. 2001 senesi Ukraina ealini cedvelge alğanda yarımadada ukrain ve qırımtatarlarnıñ sayısı bayağı çoq edi.
