Ukraina Rusiyeniñ işğal altındaki Qırımda ve Aqyarda ealini cedvelge alğanını takbih ete. Bu aqta oktâbrniñ 15-nde derc etilgen Ukraina Tış işler nazirliginiñ beyanatında aytıla.
«Rusiyeniñ bu areketleri Ukraina devlet suvereniteti ve topraq bütünligine qarşı yapıla ve vaqtınca işğal etilgen Qırımnı ilhaq etüv ıntıluvını qanunlaştırmaq, anda Rusiye qanunlarını qullandırmaq ıntıluvınıñ devamı ola. Vaqtınca işğal etilgen topraqta ealini cedvelge aluv devletimizge qarşı yapılğan duşman areketi ola ve biz cevap berme aqqımıznı saqlaymız», – dep aytıla beyanatta.
Müessise, BM Baş Assambleyasınıñ 68/262 qararınıñ maddelerine köre, 2014 senesi keçirilgen ve Ukraina ve çoqusı memleket tarafından tanılmağan «referendumnıñ» «uquqiy küçü yoq ve Qırım yarımadasınıñ statusını deñiştirmek, hususan işğal etilgen Qırımda ealini cedvelge aluv neticelerini aydınlatmaq içün bir temel olamaz», dep qayd etti.
Ukraina Tış işler nazirligi qayd etkenine köre, Qırımdaki vaziyetke qıymet kesmek içün «belli mandatı olğan tek halqara teşkilâtlarnıñ ve ükümetke bağlı olmağan aq qorçalayıcı teşkilâtlarnıñ Ukraina qanunlarına ve halqara normalarğa köre keçirgen tarafsız monitoringi» temel ola bile.
«Halqara toplulıqnı Rusiyeniñ vaqtınca işğal etilgen Ukraina toprağınıñ ealisini cedvelge aluvını takbih etmesine, onı tanımamasına ve neticelerini qullanmamasına çağıramız», – dep qayd etile beyanatta.
Rusiye tarafı Ukraina Tış işler nazirliginiñ beyanatına daa cevap bermedi.
Rusiyede oktâbrniñ 15-nden noyabrniñ 14-ne qadar eali cedvelge alınacaq. Sakinler aqqında malümat Qırımda da toplanacaq. Yarımada sakinlerini rusiyeliler 2014 senesi de cedvelge alğan edi, o vaqıt Qırımda milliy terkipniñ deñişmeleri qayd etildi.
Rusiyeniñ 2014 senesi Qırımda keçirgen cedvelge aluv malümatına köre, cedvelge alınğan Qırım ealisi 1,89 million kişi, Aqyar ealisi ise 393 biñ insan oldı.
Ukraina akimiyeti bu raqamlarğa esaslanıp, Rusiyeni vaqtınca işğal etken yarımadağa vatandaşlarını ketire, dep qabaatlay. 2001 senesi Ukraina ealini cedvelge alğanda yarımadada ukrain ve qırımtatarlarnıñ sayısı bayağı çoq edi.
