Ukraina prezidenti Petro Poroşenko Minskte «norman dörtü» sammitiniñ körüşüvi bitken soñ onıñ neticelerinden biri olaraq uçucı Nadejda Savçenkonıñ taqdiri aqqında añlaşmasını adladı.
«Men Nadejda Savçenkonı azat etüv meselesini köterdim ve eñ yaqın vaqıtta tibbiy teşkerüv bitken soñ ve taqiqatnıñ ilk neticeleri çıqarılğan soñ bunıñ yapılacağı aqqında malümat aldım. Men bunı acele yapmağa rica ettim, Frenkistan prezidenti ve Almaniya kantsleri menim muracaatıma qoltuttılar. Bu bizim talabımız edi», – dep ayttı Petro Poroşenko.
Savçenkonıñ adliyecisi Mark Feygin qayd ete ki, muzakerelerde uçucınıñ azat etilmesi aqqında añlaşqanlardır. «Almaşuv cedvelinde bar kibi», – dep yazdı adliyeci Twitterde.
Ukrain uçucısı Ukraina Yuqarı Radasınıñ deputatı olğanı ve PACE halqara immunitetini alğanına baqmadan, 2014 senesi yazdan berli Rusiyede apiste buluna. Rusiyede onı eki Rusiye jurnalistiniñ ölümine alâqası bar olğanında ve Rusiye-Ukraina sıñırından qanunsız alda keçüvde qabaatlaylar. İmayeniñ malümatına köre, jurnalistler öldürilgende Savçenkonıñ alibisi bar (bunı onıñ cep telefonınıñ geolokatsiya malümatları tasdıqlay), «sıñırdan keçüv» ise Lugansk vilâyetiniñ separatistleri ve Rusiye mahsus hızmetleriniñ hadimleri teşkil etken qaçıruvdır.
Moskva Basman mahkemesi fevral 10 künü uçucı Nadejda Savçenkonıñ apis müddetini mayıs 13-ne qadar uzatqan edi. Uçucı buña narazılığını bildirip, açlıqnı ilân etti.
O, bayağı azğan, ve adliyecileriniñ aytqanına köre, «ine alıp, yavaş-yavaş ölmekte».
«Nastoyaşçeye vremâ» bildirgenine köre, Rusiye Savçenkonıñ azat etilmesi meselesini Avropa Birligi ve PACE kibi halqara teşkilâtlar ile muzakerelerde qullandı. Aynı bu vasta ile Minsk körüşüvlerinde Rusiye Ukrainağa şartlar qoydı. Petro Poroşenko ise olarnı «qabul etilmeycek» bir şey dep adladı. Şartlar arasında Donbassnıñ alelhusus statusı da bar edi degen fikir mevcut.
Savçenkonıñ imayesi evelden bergen malümatına köre, uçucınıñ azat etilmesi «memleket reberleriniñ siyasiy qararlarına», yani Vladimir Putinniñ emrine bağlı.
