Kreml kontrolindeki Aqyarnıñ Nahimov rayon mahkemesinde fevralniñ 15-nde Aqyardaki «Hizb ut-Tahrir davası» boyunca yalan şaatlıq etkeninde qabaatlanğan Ruslan Bekirovnıñ davasında şaatlar sorğuğa çekildi. Bu aqta «Qırım birdemligi» cemaat birleşmesi haber ete.
Qayd etilgenine köre, birinci olaraq Bekirovnıñ ses örneklerini alğan Fonda F.A. sorğuğa çekildi.
«Coyulğan telefon aqqında şaat bir şey bilmey, Bekirovnıñ FSB binasından çıqqanını da körmedi. Fonda emin ki, Ruslan ve Seytosmanov dost edi, şunıñ içün Bekirov şaatlıq etip, dostuna cinaiy mesüliyetke çekilmemesine yardım etecek edi», – dep aytıla haberde.
Şaat Andreyev Y.A. mahkemede sözge çıqıp, sorğu bozuvsız keçirildi, odada Bekirovnen beraber ediler, mabüs er şeyni öz isteginen imzaladı ve bir şeyge mecbur etilmedi, dep ayttı.
Oturışuvda Aqyar garnizon arbiy mahkemesinde çalışqan Kiryanov İ.A. sorğuğa çekildi. Onıñ aytqanına köre, Bekirovnıñ mahkeme oturışuvında rus tili seviyesi sorulmadı, amma terciman ihtiyacı bar.
2015 senesiniñ ses qaydında sesniñ kimge ait olğanını bilmek içün fonografik ekspertiza keçirgen şaat Tkaçenko A.V. sorğuğa çekildi. Qayd etilgenine köre, ses qaydlarında montaj barmı teşkerilmedi, tahqiqat ise böyle bir vazife bermegen edi.
Şaat Seytosmanov Rusiye Anayasasınıñ 51-inci maddesine esaslanıp, şaatlıq etmege razı olmadı.
Ruslan Bekirovnıñ imayesi oturışuvda Bekirovnıñ mahkeme-tibbiy psihiatrik ekspertizasını keçirgen şaat Sokolova Y.P.ni çetleştirmege talap etti.
«Bagirov tahallüsli şaatnıñ sorğu protokolı da seslendirildi. FSB malümatına köre, o, Rusiyede degil, amma bu malümatnı teşkermege çare yoq. İmaye biriniñ bu malümatnı bergeninden şübhelene, protokol basıla bilir edi», – dep bildirdi faaller.
Olarnıñ malümatına köre, Ruslan Bekirovnıñ imayecisi Emil Kurbedinov, qabaatlav qıymet kesüvlerge esaslana, ciddiy deliller yoq, olarnıñ yerine ekspert, mahkeme ve tahqiqatnıñ subet yoravları bar, dep ayta. Bekirovnıñ qabaatını isbatlaycaq ses qaydı ise ekspertizasız bir şey isbatlap olamay.
Hatırlatamız, fevralniñ 11-nde Kreml kontrolindeki prokuror Aqyardaki Rusiye mahkemesinden «Ruslan Bekirov davasınıñ» mabüsi içün 400 saat mecburiy iş berilmesini istedi.
Yanvarniñ 29-nda Aqyarda Rusiye mahkemesi «Ruslan Bekirov davası» boyunca gizli şaatnı gizlilikten çıqarmağa razı olmadı.
Bundan evel berilgen malümatqa köre, qırımlı Ruslan Bekirovnıñ davası boyunca qabaatlavnıñ gizli şaatı çetelde buluna.
Qırım FSBsi Ruslan Bekirovnı «Hizb ut-Tahrir davası» boyunca 17 yılğa üküm etilgen Enver Seytosmanovğa qarşı yalan şaatlıq etkeninde (Rusiye Ceza kodeksiniñ 307-nci maddesiniñ 1-inci qısmı) qabaatlay.
Qararda aytılğanına köre, FBS tahqiqatı, 2019 senesi mart ayında sorğu vaqtında Bekirov «tahqiqatçı tarafından iç bir maneviy ve fizik basqı yapılmağanda» 2015 senesi yanvar ayında «Seytosmanovnıñ hizb olğanı aqqında aytqanını» eşitti, dep bildirdi.
Tahqiqat, Bekirovnıñ şaatlığını Enver Seytosmanovnıñ dava malümatlarına «Hizb ut-Tahrir» teşkilâtı ile alâqaları bar olğanınıñ delili olaraq ilâve etti. Faqat, yarım yıldan soñ, 2019 senesi avgust ayında Seytosmanovnıñ davası temelden baqılğanda, Ruslan Bekirov Cenübiy okrugınıñ mahkemesinde söz aytıp, qadılarğa FSB hadimleriniñ basqısı altında Seytosmanovğa qarşı şaatlıq etti, dep bildirdi.
Bekirov advokat Emil Kurbedinovnen beraber Qırımdaki Arbiy-tahqiqat komitetine onı sorğuğa çekken FSB hadimlerine qarşı teşkerüv keçirmek ricası ile ariza berdi.
Rusiye FSBsi Ruslan Bekirovğa qarşı davanen bağlı açıq izaatlarını bermedi.
İyünniñ 11-nde Rusiye FSBsi Balıqlava rayonınıñ sakini Ruslan Bekirovnı tuttı. Oña qarşı Rusiye Ceza kodeksiniñ 307-nci maddesiniñ birinci qısmına istinaden (bile-bile yalan şaatlıq etüv) açıldı. Daa soñra onı bir yerge ketmemek şartınen yibergenler.
ABD, Qırımda Ruslan Bekirovğa qarşı dava açılğanını ve tutuluvını takbih etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
