Link açıqlığı

Saatnıñ esas haberi

FSB, qırımtatarı Bekirovnı bir yerge ketmemek şartınen yiberdi – advokat


Ruslan Bekirov
Ruslan Bekirov

Rusiye FSBsiniñ vekilleri Qırımnıñ Balıqlava rayonında tutulğan Ruslan Bekirovnı bir yerge ketmemek şartınen yiberdi. Bu aqta advokat Oksana Jeleznâk «Qırım birdemligine» bildirdi.

«Bugün FSBniñ tahqiqat bölüginde Bekirov Ruslan Rusiye Ceza kodeksiniñ 307-inci maddesine istinaden açılğan cinaiy davası (bilip yañlış malümat berüv) boyunca sorğuğa çekildi. Al-azırda ketmemezlik seneti altında buluna. Bazarertesi künü tahqiqat tedbirleri belgilenecek, hususan fonografik ve psihiatrik ekspertiza yapılacaq», – dep ayttı advokat.

Bekirovnıñ aytqanına köre, oña qarşı açılğan davanıñ sebebi 2019 senesi dekabr ayında 17 yıl sert rejimli koloniyada qalmasına üküm etilgen Enver Seytosmanovnıñ cinaiy davası boyunca mahkemeden evelki tahqiqatta ve mahkemede şaat olaraq bergen yazma ve ağzaviy malümatında farq ola. Bugün Ruslan Bekirov Rusiye Anayasasınıñ 51-inci maddesine esaslanıp, malümat bermekten vazgeçti.

Keçken seneniñ avgust ayında Rostov-na-Donu Şimaliy-Kavkaz okrugınıñ arbiy mahkemesinde «Hizb ut-Tahrir» teşkilâtında iştirak etkeninde qabaatlanğan Aqyar sakini Enver Seytosmanovnıñ davası boyunca mahkeme esnasında Bekirov yazma şekilde bergen malümatını red etip, FSB tahqiqatçılarınıñ basqısı altında şaatlıq etti, dep bildirdi.

Bıltır oktâbr ayında Qırımdaki Rusiye Arbiy-tahqiqat komiteti Bekirovnı sorğuğa çekken Rusiye FSBsiniñ hadimlerine qarşı tahqiqattan evel teşkerüv keçirdi.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG