Balıqlava rayonında Baydar (Orlinoye) köyünde FSB Ruslan Bekirovnı tutıp aldı. Bunı "Qırım birdemligi" birleşmesine advokat Rustem Kâmilev haber etti.
Daa evel Bekirov, bıltır 17 yıllıq apis cezasına maküm etilgen Enver Seytosmanovnıñ davasında şaat edi.
"O maña telefon etti ve onı maşnağa oturtıp Lenina, 41-ge alıp ketkenlerini aytıp yetiştirdi. Onı Rusiye CK-niñ 307 maddesi (bilerek yalan şaatlıq) boyunca qabaatlaylar", - dedi advokat.
Rusiye FSBsi qırımlınıñ tutulmasını açıq tefsir etmedi.
Bundan evel Bekirov Aqmescitteki uquq qoruyıcı merkezge yuridik yardım sorap muracaat etken edi, çünki 2019 senesiniñ mart 29-ında onı FSB hadimleri tutıp, Seytosmanovnıñ cinaiy davasında işbirlikni teklif etti.
Buña baqmadan, Bekirov mahkeme protsessinde imaye tarafından iştirak etti ve küç organlarınıñ basqısı aqqında ayttı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
