Aprelniñ 12-nde saba Aqyarda yañı koronavirus hastaları qayd etilmedi, dep bildire şeerniñ Rusiye ükümeti matbuat hızmeti.
«Yuqunç hastahanesinde COVID-19 diagnozı tasdıqlanğan eki insan yata, olar kerekli tibbiy yardım ala. Yuqunç hastahanesinde 23 insan buluna. 577 kişi yaşağan yerinde közetile», – dep aytıla haberde.
Soñki hasta qayd etilgen Nadejdintsev soqağındaki №1 şeer hastahanesi aprelniñ 9-ndan berli observator olaraq çalışa, dep qayd ete müessise.
Aprelniñ 12-si sabasına qadar Qırımda 31 koronavirus hastası qayd etildi. 2973 insan közetüv altında buluna.
Qırımda aprelniñ 11-nde bir koronavirus hastası qayd etilgen edi.
Aqyarda altı insan hastalandı, dördü tüzeldi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
