Aprelniñ 12-nde saba Qırımda 2973 insan tibbiy közetüv altında buluna. Bu aqta Qırımnıñ Rusiye Sağlıq naziri Anton Lâskovskiy Qırımda koronavirus yuqunçınıñ tarqaluvına qarşı meseleler operativ ştabınıñ toplaşuvında bildirdi.
«Soñki künde 84 insan közetüvge alındı ve 218 insan közetüvden çıqarıldı. 2780 insan evde dinamik közetüvde buluna, 46 insan hastahanede, 147 kişi observatorda qala. 12 insan tüzelip hastahaneden çıqarıldı, qalğanları tedaviylenmege devam ete. Bugünki künde ağır hastalar yoq. Hastalıq orta seviyeli ağırlıqta ya da alâmetsiz keçe», – dep qayd etti Lâskovskiy.
Aprelniñ 12-si sabasına qadar Qırımda 31 koronavirus hastası qayd etildi.
Qırımda aprelniñ 11-nde bir koronavirus hastası qayd etilgen edi.
Aqyarda altı insan hastalandı, dördü tüzeldi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
