Aqyarda dekabrniñ 19 sabası itibarınen 83 yañı COVID-19 hastası qayd etildi, daa üç hasta öldi. Bu aqta şeerniñ Rusiye ükümetiniñ matbuat hızmeti haber etti.
“19 kişi yuqunç, doquzıncı ve şeer hastahanelerine alındı, qalğanları ambulator tedaviylevde buluna. Hastalar – 7 yaştan 85 yaşqa qadar insanlar. 67 adam tüzelgen soñ hastahaneden çıqarıldı. 67 ve 81 yaşlarında üç hasta öldi”, – dep yazıla haberde.
Berilgen malümatqa köre, umumen yılnıñ başından Aqyarda 5765 insan yañı koronavirus yuqunçına oğrağan, 190 ölgen.
“Bugunde 144 hasta statsionarlarda, 37 ambulator tedaviylevde, 606 nezaret astında buluna”, - yazıla bildirmede.
Aqyarda dekabrniñ 18-nde saba 80 yañı COVID-19 hastası qayd etildi, 83 ve 88 yaşlarında eki hasta vefat etti.
Rospotrebnadzor, Qırımda koronavirustan vefat etkenlerniñ sayısı arta, hususan 50-60 yaşlarında insanlar arasında, dep qayd ete. Vefat sayısı artmasınıñ esas menfiy sebebi – tibbiy yardım içün vaqtında muracaat etmeme ola, dep bildire müessise.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
