Mayısnıñ 9-ında saba Aqyarda dört yañı COVID-19 hastalığı adisesi qayd etildi. Hastalarnıñ episi evel koronavirusqan oğragan adamlarnen alâqada bulundı, bildire Aqyarnıñ rusiye ükümetiniñ matbuat hızmeti.
Qayd etilgenine köre, umumen Aqyarda 122 koronavirus infektsiyası adisesi bar, 21 adam yahşı oldı, eki adam öldi.
"Şimdilik infektsiya hastahanesinde 129 adam nezaret altında buluna, №9 şeer hastahanesinde - 98. Yaşağan yerlerinde 1069 adam baqıla. Şeerde yañı yuquv merkezleri belgilenmedi", - denile beyanatta.
Qırımda 189 koronavirus hastası bar. 24-ü çetelden keldi, 19-ı – Rusiyeden. 23 hastanıñ Rusiyeden kelgenlernen alâqası oldı, 123 kişi laboratoriyada tasdıqlanğan hastalarnen alâqada olğan edi. 57 kişi tüzeldi, 130 adam tedaviylenmekte.
Daa evel Rusiye kontrolindeki Qırım yolbaşçısı Sergey Aksönovnıñ bildirgenine köre, mayısnıñ 8-inde 12 yañı koronavirus hastası qayd etilgen edi.
Qırımda mayısnıñ 12-nden itibaren koronavirus yuqunçına oğrav telükesi sebebinden mecburiy maska rejimi kirsetile.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
