Aqyarda beş yañı COVID-19 koronavirus hastası qayd etildi. Bu aqta Qırım ve Rusiye kütleviy haber vastaları Aqyarnıñ Rusiye ükümetiniñ yolbaşçısı vazifelerini vaqtınca eda etken Mihail Razvojayevniñ malümatına esaslanıp bildireler.
«Bugün daa beş koronavirus hastamız bar. Ekisi – №9 şeer hastahanesine avuştırılğan Daşa Sevastopolskaya hastahanesiniñ eski hastalarıdır», – dep bildire kütleviy haber vastaları Razvojayevniñ aytqanlarını.
Qayd etilgenine köre, daa bir hasta – yuqunç hastahanesiniñ qurucılığında çalışqan arbiy qurucıdır. O, aprelniñ 23-nde keskin nefes virus yuqunçı alâmetlerinen hastahanege tüşti, ertesi künü talili tasdıqlandı.
«Qayd etmeli ki, Aqyarğa yollanmazdan evel bir afta evelsi vahtacılarnıñ eki testi yapıldı ve koronavirus qayd etilmedi. Epidemiologik tahqiqat keçirile, qurucı virusnı Aqyarda da alması mümkün… Onıñnen beraber hostelde daa 60 işçi çalıştı. Bir odada qalğan 13-ü yaramadı – yuqunç hastahanesinde bulunalar, qalğanları Omegada arbi hastahanege avuştırıldı, observatsiyada bulunalar», – dep bildire kütleviy haber vastaları şeer yolbaşçısınıñ aytqanlarını.
Razvojayevniñ qayd etkenine köre, daa bir hasta Belbek ava limanındaki qurucılıqtan. Anda 80 qurucı bar, qurucılıq meydançığında közetüv altında bulunacaqlar. Beşinci hasta yuqunç hastahanesinde çalışqan emşire ola.
Aqyarda hastalarnıñ sayısı 31 oldı, beş kişi tüzelip yahşı oldı.
Aprelniñ 24-nde Aqyarda 26 koronavirus hastası bar edi.
Qırımnıñ Rusiye yolbaşçısı Sergey Aksenovnıñ bildirgenine köre, aprelniñ 24-nde 10 koronavirus hastası qayd etildi.
Haber etilgenine köre, Aqmescit klinik hastahanesi qayd etilgen koronavirus hastaları sebebinden aprelniñ 24-nden berli qapalı qala.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
