"Aqyar devlet universiteti" koronavirus sebebi ile martnıñ 17-sinden başlap distantsion ögretüvge keçe. Bunı universitetniñ hadimi Yekaterina Sorokina haber etti.
"Federal tasil standartlarına uyğun fenlerniñ bazıları distantsion tasil donatmaları ve ekektron ögretüv ile ayatqa keçirile bilmez, buña köre bu bölüklerniñ talebeleri şahsiy örgenüvke keçirilecek", - añlattı o.
Universitetniñ matbuat hızmeti qayd etti ki, distantsion ögretüv ile bağlı qoşma malümat keççe derc etilecek.
Martnıñ 16-sından başlap Aqmescitte Vernadskiy adına Qırım Federal Universitetinde COVID-19 koronavirusınıñ yayılması sebebinden distantsion oquş rejimi kirsetile.
Martnıñ 12-sinde Dünya sağlıq teşkilâtı koronavirus pandemiyasını ilân etti.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
