Rusiye nezaretine olğan Aqyardaki Nahimov mahkemesiniñ oturışında advokat Emil Kurbedinov, yalan şaatlıq etkeninen qbaatlanğan qırımlı Ruslan Bekirovnıñ davasında gizli şaatnıñ üstü asçılmasını istedi. Qırım. Aqiqatqa bunı “Qırım birdemligi” cemaat birleşmesi haber etti.
“Ne men, ne prokuror böyle bir adam barmı, yoqmı, sorğuğa çekildimi, yoqmı, protokol imzaladımı, yoqmı ve böyle bir kişi olsa şimdi onen ne olğanını bilmeymiz”, – dey advokat.
O, mahkeme vaqtında şaatnıñ şahsiy malümatı taqdim etilgenini talap ete.
“Bunı, onı gizlemege iç bir sebep olmağanı ile añlattım. Dava materiallarında o, bir de bir telüke altında olğanı aqqında iç bir delil yoq. Mahkeme menim muracaatımnı diñlep, bu gizli şaat al-azırda devlet imayesinde bulunğanı, bulunmağanımı, FSB-de qabaatlanğandan havf kerçekten olğanı aqqında deliller barmı, yoqmı ögrenmek içün FSB-den qoşma malümat talap etmek kerek olğanı aqqında qarar aldı”, – dep qoştı o.
Mahkeme, FSB-den malümat talap etip, teneffüs ilân etti, imaye tarafı ise isbatlarnı taqdim etip başladı.
“Nevbetteki oturışta mahkeme gizli şaatnıñ üstüni açmağa ya da açmamağa mesele aqqında qarar alacaq, Bekirov sorğuğa çekilecek, munaqaşalar olacaq ve soñki söz”, – dep yekündedi Kurbedinov.
Qırım FSBsi Ruslan Bekirovnı «Hizb ut-Tahrir davası» boyunca 17 yılğa üküm etilgen Enver Seytosmanovğa qarşı yalan şaatlıq etkeninde (Rusiye Ceza kodeksiniñ 307-nci maddesiniñ 1-inci qısmı) qabaatlay.
Qararda aytılğanına köre, FBS tahqiqatı, 2019 senesi mart ayında sorğu vaqtında Bekirov «tahqiqatçı tarafından iç bir maneviy ve fizik basqı yapılmağanda» 2015 senesi yanvar ayında «Seytosmanovnıñ hizb olğanı aqqında aytqanını» eşitti, dep bildirdi.
Tahqiqat, Bekirovnıñ şaatlığını Enver Seytosmanovnıñ dava malümatlarına «Hizb ut-Tahrir» teşkilâtı ile alâqaları bar olğanınıñ delili olaraq ilâve etti. Faqat, yarım yıldan soñ, 2019 senesi avgust ayında Seytosmanovnıñ davası temelden baqılğanda, Ruslan Bekirov Cenübiy okrugınıñ mahkemesinde söz aytıp, qadılarğa FSB hadimleriniñ basqısı altında Seytosmanovğa qarşı şaatlıq etti, dep bildirdi.
Bekirov advokat Emil Kurbedinovnen beraber Qırımdaki Arbiy-tahqiqat komitetine onı sorğuğa çekken FSB hadimlerine qarşı teşkerüv keçirmek ricası ile ariza berdi.
Rusiye FSBsi Ruslan Bekirovğa qarşı davanen bağlı açıq izaatlarını bermedi.
İyünniñ 11-nde Rusiye FSBsi Balıqlava rayonınıñ sakini Ruslan Bekirovnı tuttı. Oña qarşı Rusiye Ceza kodeksiniñ 307-nci maddesiniñ birinci qısmına istinaden (bile-bile yalan şaatlıq etüv) açıldı. Daa soñra onı bir yerge ketmemek şartınen yibergenler.
ABD, Qırımda Ruslan Bekirovğa qarşı dava açılğanını ve tutuluvını takbih etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
