Aqmescitteki ekinci «Hizb ut-Tahrir davasınıñ» eki mabüsi İzzet Abdullayev ve Alim Karimov bir qaç kün evelsi Rostov vilâyetiniñ Şahtı şeerindeki SİZOdan çıqarıldı. Bu aqta «Qırım birdemligi» advokat Emil Kurbedinovnıñ malümatına esaslanıp bildire.
Onıñ aytqanına köre, olarnı Rusiyeniñ Rostov-na-Donu şeerinden Aqmescit SİZOsına ketirmek kerekler.
«Bugün Tofik Abdulgaziyevni ziyaret ettim. Alı yahşı, şikâyetleri yoq, er şey ala. İzzet Abddulayev ve Alim Karimov bir qaç kün evelsi Şahtı şeerinden çıqarılğanını ayttı. Qayda alıp ketirilgenlerini bilmey. Hadimlerniñ malümatına köre, bu künleri Tofik Abdulgaziyev ve Yaşar Muyedinov da çıqarılacaq. Bunıñ sebebini kimse aytıp olamay, olarnı ne içün ve ne maqsadnen çıqaralar – aytılmay», – dedi advokat.
Rusiyeniñ Cezalarnı yerine ketirüv federal hızmeti bu malümatnı daa izaatlamağan edi.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
