Sentâbrniñ 19-nda Aqmescitte «Qırım birdemliginiñ» faali Osman Belâlov 5 kün devam etken memuriy tevqif cezasından soñ azatlıqqa çıqtı, dep bildire Qırım.Aqiqat mühbiri.
Belâlovnı tuvğanları, dostları ve faaller qarşıladı. O, nezaret altında tutulması «uquqiy qanunsızlıq» ve «razı olmağanlarğa qarşı küreş» olğanını tüşüne.
«Bir devlet başqa devletniñ uquqiy alanında olğanlar içün bizni ilk sefer mahküm etmey. Olar bunı ekstremizm ile küreş dep adlandıralar, amma asılında akimiyet istemegen insanlarnı çetleştireler», – dep ayttı Belâlov.
Faal toplaşqanlarğa minnetdarlığını bildirip, izolâtorda suvuqlansa da, umumen özüni yahşı is etkenini ayttı.
Kreml kontrol etken Bağçasaray şeer mahkemesi «Qırım birdemliginiñ» faali Osman Belâlovğa memuriy ceza berip, onı 5 künge nezaret altına aldı. Belâlov «yasaqlanğan teşkilâtnıñ timsallerini numayış etmesinde ve ekstremist malümatlarını kütleviy tarqatmasında» qabaatlandı.
Bundan evel Rusiye uquq qoruyıcıları «Qırım birdemligi» cemaat teşkilâtınıñ faali Osman Belâlovnıñ evinde tintüv ötkerdi. O, evde degil edi. Aqmescitke ketti, amma baralmadı. Faalniñ tuvğanları bulunğan yerini bilmey edi. Soñra olarnen bağlanıp oldı.
Tintüvden soñ Belâlovlarnıñ babası tutuldı ve soñra çıqarılıp yiberildi.
Ukraina Tış işler nazirligi «Qırım birdemligi» faaliniñ evinde ötkerilgen tintüvni takbih etti.
2016 senesi Qırımnıñ rus mahkemesi Osman Belâlovqa 10 biñ ruble para cezasını tayin etken edi. O, 2016 senesi mayısnıñ 12-nde Bağçasaraydaki «Salaçıq» kafesi yanında «ruhsetsiz mitingte» iştirak etüvde qabaatlanğan edi. O künü faaller Rusiye telükesizlik hadimleri qırımtatarlarda tintüv yapqanını eşitip, kafe yanında toplaşqan edi.
