Kreml nezaretindeki Bağçasaray şeer mahkemesi “Qırım birdemligi”niñ faali Osman Belâlovnı Rusiyeniñ MC Kodeksiniñ 20.29 maddesine istinaden (yasaqlanğan teşkilât timsallerini numayış etüv ve ekstremist malümatlarını kütleviy sürette tarqatuv) 5 künge tevqif etti.Bu aqta Qırım.Aqiqat muhbiri haber ete.
Aynı zamanda mahkeme oturışuvında, Belâlovnıñ yasaqlanğan teşkilât timsallerini kütleviy sürette numayış etüvi boyunca qabaatlanuvı baqılmaqta.
Faallerniñ sözlerine köre, mahkeme oturışuvı aqqında malümat belgilengen vaqıtqa yarım saat qalğanda haber etilgen.
Bir kün evel, sentâbrniñ 13-nde saba evinde rusiyeli telükesizlik hadimleri tintüv yapqan “Qırım birdemligi”niñ faali Osman Belâlovnıñ aqrabaları o tapılğanı aqqında haber etken edi.
Tintüv yapılğan maalde Osman Belâlov evde yoq eken. O, Aqmescitke ketken, lâkin baracaq yerine barıp yetalmağan. Soy-sopu onıñ ne yerde olğanını bilmey edi.
Tintüvden soñ, Belâlovlarnıñ babasını tutulıp alınğan, amma çoqqa barmay çıqarılıp yiberildi.
Tafsilâtlıca Qırım.Aqiqat saytınıñ «Qırımda yañı tintüv ve onıñ iştirakçisi ğayıp olğan» adlı maqalesinde oqunız.
Ukraina Tış işleri nazirligi ”Qırım birdemligi”niñ faali Osman Belâlovnıñ evinde tintüv yapılğanını taqbih etti.
2016 senesi Qırımnıñ rusiyeli mahkemesi Osman Belâlovqa 10 biñ ruble para cezası tayin etken edi. O, 2016 senesi mayısnıñ 12-nde Bağçasaraydaki “Salaçıq” kafesi yanında “ruhsetsiz mitingte” iştirak etüvde qabaatlanğan edi. O künü faaller rusiyeli telükesizlik hadimleri qırımtatarlarda tintüv yapqanını eşitip, kafe yanında toplanğan ediler.
