Bağçasarayda qırımtatar faali Osman Belâlov ve “Hizb ut-Tahrir davası”nıñ iştirakçisi Memet Belâlovnıñ evinde tintüv keçken soñ tutulıp alınğan babası Reşat Belâlov Qırmda Rusiye politsiya bölüginden çıqarılıp yiberildi. Bu aqta “Qırım birdemligi” birleşmesi haber ete.
Sentâbrniñ 13-nde saba rusiyeli telükesizlik hadimleri “Qırım birdemligi”niñ faali Osman Belâlovnıñ evinde tintüv ötkerdi. O, Bağçasaraydaki “Hizb ut-Tahrir davası”nıñ iştirakçisi Memet Belâlovnıñ qardaşı ola. Tintüvden soñ Belâlovlarnıñ babası tutulıp alındı.
Osman Belâlovnıñ aqrabaları şimdilik onıñ ne yerde olğanını bilmey.
Ukraina Tış işleri nazirligi ”Qırım birdemligi”niñ faali Osman Belâlovnıñ evinde tintüv yapılğanını taqbih etti.
2016 senesi Qırımnıñ rusiyeli mahkemesi Osman Belâlovqa 10 biñ ruble para cezası tayin etken edi. O, 2016 senesi mayısnıñ 12-nde Bağçasaraydaki “Salaçıq” kafesi yanında “ruhsetsiz mitingte” iştirak etüvde qabaatlanğan edi. O künü faaller rusiyeli telükesizlik hadimleri qırımtatarlarda tintüv yapqanını eşitip, kafe yanında toplanğan ediler.
