SİZOda ciddiy tutuvı olğan «Qırım birdemligi» cemaat birleşmesiniñ faali, Aqmescitteki ekinci «Hizb ut-Tahrir davasınıñ» mabüsi Şaban Umerovğa tibbiy yardım kösterilmey. Bu aqta dekabrniñ 30-nda Umerovnı ziyaret etken advokatı Nazim Şeyhmambetov bildirdi.
«Tahqiqat izolâtorında Şaban Umerovnen körüşip oldım. Ziyaretimniñ maqsadı oña tibbiy yardım kösterilemi-yoqmı bilmek edi. Al-azırda soñki ziyaretimden ve ariza bergenimden berli tibbiy yardım oña kösterilmedi», – dep tarif etti Şeyhmambetov.
Onıñ bildirgenine köre, Umerov boyunca prokuror teşkerüvi yapıldı. Umerovnen Rusiye prokurorı subetleşti. Faal oña tibbiy yardım mevzusında qarşılaşqan problemler aqqında tarif etti.
«Eñ yaqın vaqıtta oña kerekli tibbiy yardım kösterilir, dep ümüt etemiz, çünki yaş adam degil, bir sıra hastalığı bar. Böyle yardım kösterilmese, kritik fenalaşuv telükesi bar. Buña yol bermemek içün belli organlarğa muracaat etemiz, Şaban Umerov da öz seviyesinde SİZO tibbiy bölüginden yardım istey», – dep ayttı advokat.
Advokat Şeyhmambetov Umerovğa tibbiy yardım kösterilmey, dep bildirgen edi.
«Qırım birdemliginiñ» malümatına köre, dekabrniñ 14-nde Şaban Umerovnıñ Aqmescit tahqiqat izolâtorında ciddiy tutuvı oldı.
Şaban Umerov 1969 senesi dünyağa keldi, «Qırım birdemligi» cemaat birleşmesiniñ faali ola, siyasiy mabüslerge yardım taşığan edi. Üç balası bar. Rusiye Ceza kodeksiniñ 205.5 maddesiniñ 1-inci qısmına istinaden («Terror teşkilâtınıñ faaliyetini teşkil etüv», ömür boyu apis cezası berile bile) qabaatlana.
2019 senesi martnıñ 27-nden berli apiste yata.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
