Aqmescitte Rusiye İç işler nazirligi ve Rusiye gvardiyasınıñ hadimleri demiryol vokzalındaki sürgünlik qurbanlarınıñ hatıra taşı yanında toplaşqanlardan dağılmalarını rica etti. Bu aqta Qırım.Aqiqat mühbiri bildire.
Haber etilgenine köre, miting iştirakçilerini «qanunsız açıq tedbir» içün mesüliyet aqqında tenbilediler. Tedbirniñ soñunda faaller ve uquq qoruyıcı organlarınıñ hadimleri arasında küçük qavğa çıqtı. Birazdan insanlar ketmege başladı.
Qırım.Aqiqat mühbiriniñ bildirgenine köre, Qırımtatar halqı sürgünliginiñ qurbanlarını añma kününe bağışlanğan matem tedbiri 1944 senesi insanlarnen tolu vagonlarnıñ çıqqan demiryol vokzalındaki hatıra taşı yanında yekünlendi.
Tahminen 50 insan Lenin bulvarı yanındaki skverden vokzalğa kolonna şeklinde ketti, bir çoqunıñ qolunda milliy timsaller bar edi. Taş yanında toplaşqanlar dua oqudı, sürgünlikni körgen bir qaç insan çekkenlerini ikâye etip, elâk olğanlarnı unutmamağa çağırdı.
Demiryol vokzalındaki hatıra taşına çeçek qoyğan Qırımdaki Ukrain medeniyet merkeziniñ faali Alena Popova Qırım.Aqiqatqa kimligi belli olmağanlar abideden Ukraina bayrağını alıp taşladı, dep bildirdi.
Bugün Aqmescitte qırımtatar sürgünliginiñ 75 yılına bağışlanğan matem tedbiri Rusiye quvetçileriniñ nezareti altında keçirildi.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
