Bugün Lütfiye Zudiyeva ve Mümine Saliyevanıñ memuriy davaları baqılacaq Rusiye nezaretindeki Aqmescitniñ Kiyev rayon mahkemesi yanına rusiye quvetçilerinen avtozaklar keldi. Bu aqta Qırım.Aqiqat mühbiri bildirmekte.
Bu malümatqa köre, mahkeme yanına polis hadimleri ve OMON askerleri bir qaş gruppa olıp keldi.
Bildirilgeni kibi, bütün Qırımdan 300-ge yaqın adam Rusiye nezaretindeki Aqmescitniñ Kiyev rayon mahkemesi yanına Lütfiye Zudiyeva ve Mümine Saliyevaga qol tutmaq içün keldi, bugün olarğa qarşı Rusiye Memuriy cinayetler kodeksiniñ 20.3 maddesine köre qabaatlavlar baqılacaq. Bu aqta Qırım.Aqiqat mühbiri bildire.
Mahkeme oturışı saat 9:30 başlanacaq edi, amma keçke qala, çünki dava malümatı alâ daa mahkeme kantselâriyasına berilmedi.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve cemat jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı. Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı.
Zudiyeva aytqanına köre, dava malümatında 2014 yılı aprelde yapılğan Tagir Minibayevniñ yazısı keçe, o internet yazıda Zudiyeva qayd etilgen edi.
Al-azırda Qırım ve qomşu Rusiyeniñ müessiseleri bir de bir izaat bermediler.
