Fevralniñ 13-ünde, Aqmescitte Opel Vectra ve Chevrolet Aveo maşnaları qazağa oğradı. Neticede üç adam yaralandı.
Bunı Rusiye FVN-niñ Qırım idaresiniñ matbuat hızmeti haber etti.
"2020 senesi fevralniñ 13-ünde Aqmescit şeerinde Opel Vectra maşnasınıñ 1997 senesi doğma aydavcısı, Aqmescit - Kefe yolundan ketkende, Zuya qasabası yanında qarşı yolaqqa çıqtı ve Chevrolet Aveo maşnasınen çatıştı", - denile beyanatta.
Müessise, qazada üç adam yaralanğanını qoştı - Opel Vectranıñ aydavcısı, Chevrolet Aveonıñ aydavcı ve yolcusı. Olar hastahanege qoyulğanı haber etile.
Fevralniñ 13-ünde "Saq - Mamaşay" yolunda Aqmescit rayonınıñ Kün Tuvğan köyünde "VAZ-21101" maşnasınıñ aydavcısı, Saq tarafından ketkende, maşna idaresini becermeyip, qarşı yolaqqa çıqtı ve "Gazel" maşnasınen uruldı. Qazada adamlar elâk oldı.
Bağçasaray rayonınıñ Ulaqlı (Glubokiy Yar) köyü civarında "Tavrida" trassasında fevralniñ 5-inde aqşam yol qazası oldı.
Fevralniñ 6-sında saba Aqmescit-Bağçasaray-Aqyar yolunda yengil maşna ve yük maşnası çatıştı, qazada üç adam elâk oldı.
Fevralniñ 4-ünde aqşam "Kezlev - Aqmeçit" yolunda Saq rayonında eki yengil maşna - VAZ-2112 ve Geely - çatıştı. Qazada yedi adam yaralandı.
Qırımda fevralniñ 3-ünde, neticesinde piyadeler öldürilgen eki yol qazası oldı. Bir maşna Aluşta civarında aqaynı urıp öldürdi. O piyadeler keçitinden yolnı keçe edi. Ekinci qaza Keriçte oldı, anda tükân yanında aydavcı esli qadınnı bastı.
Daa evel İslâm Terek (Kirovskoye) rayonında fevralniñ 3-ünde aqşam "Tavrida" trassasında yengil maşna ve yük maşnası çatıştı. Üç adam yaralandı, olarnı hastahanege alıp kettiler.
