Silâlı zıddiyet neticesinde zarar körgen insanlarnı qorumaqnen oğraşqan cemaat teşkilâtları «COVID-19 pandemiyası sebebinden vaqtınca işğal etilgen topraqlardaki kritik gumanitar vaziyet sebebinden» Ukraina Nazirler şurasına muracaat ete.
«Vaqtınca işğal etilgen topraqlarda yaşağan Ukraina vatandaşlarınıñ keyfiyetli tibbiy yardım almaq, sağlıq vaziyetini kontrol etmek içün aile ekimi ile daimiy bağ qurmaq imkânı yoq», – dep aytıla muracaatta.
Berilgen malümatqa köre, Qırım ve Donbasta «COVID-19 hasta seviyesine kerekli qıymet kesilmegeni ve kütleviy şekilde test yapılmağanı içün eali arasında yuqunç tarqaluvı kontrol etilmey».
«İşğal altındaki topraqlarda tibbiy sistema kollapsqa oğradı, çünki tibbiyet hadimleri bu yükni becerip olamay, bazı mesken yerlerinde tibbiy müessiselerniñ işi üç qat arttı, hasta ve tibbiyet hadimleri içün uyğun olmağan şifahaneler qullanıla, acele yardım maşinası 10 saatqa qadar beklenile, bazı vaqıtları tibbiyet hadimleri iç kelmey; vatandaşlarnıñ tibbiy yardım ve ilâc imkânları sıñırlana», – dep ayta aq qorçalayıcılar.
Keçken künü Qırımda 225 yañı koronavirus hastası qayd etildi. Umumen pandemiya başlağanından 9009 COVID-19 hastası qayd etildi. Qırımnıñ tibbiy müessiselerinde 3616 insan tedaviylene, 5160 kişi tüzelgen soñ çıqarıldı. 129 insan vefat etti.
Oktâbrniñ 29-nda saba 74 yañı COVID-19 hastası qayd etildi. 33 hasta yuqunç ve doquzıncı şeer hastahanelerine alındı, 41 insan ambulator tedaviylevde buluna.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
