Keçken künü Qırımda 225 yañı koronavirus hastası qayd etildi, 39-ınıñ hastalıq alâmetleri yoq edi, dep bildirdi Qırımnıñ Rusiye yolbaşçısı Sergey Aksenov.
«157-si tibbiy yardım içün muracaat etkende qayd etildi, 68-i daa evel hastalarnen alâqada oldı», – dep aytıla içtimaiy ağlarda saifesinde.
Onıñ malümatına köre, keçken künü Qırımdaki laboratoriyalarda 5587 insannıñ tedqiqi yapıldı. 5160 insan tüzeldi, Sağlıq nazirliginiñ malümatına köre, 123 hasta vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
