Qırımtatar halqı ile birdemlik aftası çerçivesinde mayısnıñ 21-nde «Qırımtatarlarnıñ gibrid sürgünligi. Kreml repressiyalarına tirenüv ve yañı halqara sanktsiyalar» online matbuat konferentsiyası ötkerilecek.
Teşkilâtçıları qayd etkenine köre, matbuat konferentsiyası vaqtında Ukraina ve halqara aq qorçalayıcı teşkilâtlarınıñ vekilleri kütleviy haber vastalarınıñ diqqatını «Kremlniñ yarımadada qırımtatarlarnıñ gibrid sürgünligini ardı-sıra kirsetkenine» celp etti.
Aq qorçalayıcılar «Qırım birdemligi» cemaat birleşmesiniñ koordinatorı Server Mustafayev apiske alınğanınıñ yılı aqqında hatırlatmağa istey.
«Siyasiy taqip yapıluvına dos-doğru alâqası olğan Rusiye resmiy şahıslarına qarşı yañı halqara sanktsiyalar aqqında tarif etilecek», – dep ilân ete teşkilâtçılar.
Aq qorçalayıcılar BM, Avropa Şurası, Avropa Birligi ve OSCEge Rusiyede, hususan işğali altındaki Qırımda ve Donbas topraqlarında apiste qanunsız tutulğan biñlernen sakinini COVID-19-ğa oğrav telükesinden qurtaruvnen bağlı global istidanameler aqqında hatırlatacaq.
Matbuat konferentsiyası cumaaqşamı künü saat 11:00-da (Kyiv saatı) ZOOM platformasında başlanacaq.
Ukraina Baş prokurorı ofisiniñ matbuat hızmeti malümatına köre, Rusiyeniñ Qırım işğali vaqtında yarımadanı 48 biñ kişi terk etti. Rusiyeliler yarımadanıñ faal müstemlekeleştirüvini kerçekleştire. Mart ayında Krımstat, resmiy malümatqa köre, 2014 senesi Rusiyeden yarımadağa 172 biñden çoq kişi ketti, dep bildirdi: 96 biñi Qırımda qayd oldı, Aqyarda – 76 biñ.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Kyivde qırımtatar halqı sürgünligi ve genotsidiniñ qurbanları hatırasına avtoyürüş keçirildi. Qırımtatar genotsidiniñ qurbanlarını añma kününe bağışlanğan «Bir ağrı. Bir tarih» online munaqaşası oldı.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
