krainada ABD işlerinden vaqtınca mesüliyetli olğan William Taylor, şimdilik Rusiyege qarşı kirsetilgen sanktsiyalar yeterli degil, dep saya. O, Rusiye tecavuzıni devam etkenini ve Qırım alâ daa ilhaqta olğanını qayd ete. Teylor, AQŞ, Rusiyege tesir etmek içün daa bir sıra tedbirlerni qullana bilecegini ayta.
Bunı o, Gürcistannıñ Birinci kanalına intervyü bergende ayttı.
"Rusiyege qarşı kirsetilgen sanktsiyalar yeterli degil, çünki bu vaqıt içinde, rusiyeliler Donbass ya Qırımnı terk etkenlerini körmeymiz", - dedi Teylor.
Onıñ aytqanına köre, sanktsiyalarnıñ maqsadı - "Rusiye tecavuziy areketlerini toqtatsın dep maqsadınen, onı çekiştirmek".
"Şimdi, dünya topluluğı kirsete bilecek daa keñ sanktsiyalar bar. Olar, mudafaa, energetika, maliye saalarına bağlı ola bile. Bundan ğayrı, bayağı adamğa viza almaq, degerli kâğıtlarını buzlatmaq içün sıñırlavlar kirsetile bile", - qoştı Teylor.
Bundan evel ABD Ukraina meseleleri devlet departamentiniñ mahsus vekili Kurt Volker, Qırım ilhaqı içün Rusiyege qarşı sanktsiyalar, yarımada işğalden boşatılmağance, ükümsürecegini ayttı.
2019 yılı iyün ayında Avropa Birliginiñ Şurası Qırım ve Aqyarnıñ ilhaqı neticesinde Rusiyege qarşı kirsetilgen sanktsiyalarnı uzatmaq qararını aldı.
Hususan, Qırım mahsulatını satılması, Qırımğa Avropa yatırımı yapılması, anda köçmemezlikniñ satın alınması, hızmet berilmesi, bizneske para ayırılması yasaqtır.
