Link açıqlığı

Saatnıñ esas haberi

"Apokalipsis aqqında filmlerde kibi": boş "Tavrida" trassasından seyahat


Boş "Tavrida" trassası, 2020 senesi, aprel 2
Boş "Tavrida" trassası, 2020 senesi, aprel 2

Qırımda ilân etilgen karantinniñ başında Aqmescitke maşnanen barıp kelgen edim, ve bu sefer soñki yıllarnıñ eñ pozitiv seferi edi.

"Tavrida" trassasınıñ şimdilik tek eki yolağı çalışqanına baqmadan, yol aman-aman boş edi.

Kimerde bir-eki yengil maşna rastkele edi, amma çoqusı - trassa qurulışında qulanılğan ve malnen cermaynı taşığan yük maşnaları edi.

Şarqiy Qırımdan Aqmescitke ketkende bütün "Tavrida" trassasında daa bir dane de yaqıt stantsiyası yoq - tek modul stantsiyaları ve biokenefler.

Bu muvaqqat stantsiyalarında şimdi yaqıt çeşitleri zayıftır. Normal bir yaqıt stantsiyasına barıp çıqmaq içün, Primorskiy qasabasından Qarasuvbazarğace qısmında trassadan eski yolğa keçip, alâ daa çalışıp turğan, amma maşnaları az olğan büyük yaqıt stantsiyasına barmaq mümkün.

Yaqıt stantsiyalarındaki kafeler qapalı, raatlıq ve aş meydançıqları çalışmay. Sadece çay ya da qave almaq mümkün em de paketlengen yemeklerni.

Naqliyat az olğanına baqmadan, yol boyu surat teşkericileri tura, kimerde yol polisiniñ maşnaları rastkele.

Aqmescitke kirem: kirişte biraz çoqçaraq naqliyat oldı, amma şeer merkezinde, Kuybışev alqasında ve Kiyevskaya soqağında - Apokalipsis aqqında filmlerde kibi - ne maşna bar, ne adam.

Qaytqanımda yol daa da boşadı. "Tavrida"nıñ bazı qısımlarında tehnika çalışa, işçiler yolnıñ eki yolağına asfalt-beton qatlamını töşey.

Qarasuvbazar civarında Aq Qayanıñ yanında keçe edim ve tüşündim ki, çalarğan Aq Qayanıñ baqımından, eteginde anda-mında yürip turğan adamlar - seyareniñ bedenindeki virus kibidir. Adamlar da ise, virus kibi, zararlı ve faydalı soyları bar.

Soñra aqlıma keldi ki: vaqıt keçer, Qırım da zararlı viruslardan vazgeçip, sağlam bir ayat yaşaycaq.

Vasıl Korçev, keriçli Qırım blogeri

«Bloglar» rubrikasında bildirilgen fikir-tüşünceler müelliflerniñ noqtaiy-nazarını bildirip, muarririyetniñ baqışları ile aynı olmaması mümkün

XS
SM
MD
LG