Bugün noyabrniñ 30-ı 2021 senesi. Men 1-nci SİZO-da öz kameramdam. Tahminen bir afta evelsi hastalanğanımnı duydım, suvuqlandım, çünki sigaret tütüni sebebinden pencere daima açıq. Şimdiki vaqıtta kamerada doquz adam, yer ise tek altı adm içün. Kimerleri tabanğa yorğan töşep yatalar, qalğanları künde 12 saat deñişeler.
Er vaqıt eñ azından 3-4 kişi öksürip tura, men olarğa ilâclarımnı berem, tezden tedaviylensinler dep. Özüme de muqayt olıp başladım: yahşı, sıcaq kiyinem, limonnen sıcaq çay ve apayım berip yibergen ilâclarnı içem. Ekimni çağırmaq içün ariza yazmaq kerek, feldşer kele ve sıcaqnı qolunen tiyip baqa ve anginağa qarşı ilâc bere. Bundan ğayrı başqa bir şey onda yoq.
Mında, bu suvuq divarlarda bulunıp, immunitet qaviy olsa bile, sağlam qalmaq qıyındır. Atta sıcaq kiyinip, yelden saqlanıp, suvuqlanmaq mümkün: biri hastalandı, digeri de yuqtı.
Mennen bir qamerada oturğanlar televizorda haberlerni açqanda ve deral alevlenem ve kanalnı başqasına deñiştirilmesinde israr etem. Adetince, kanallarnı baqmaq yerine daa faydalı bir şeynen oğraşmağa tırışam. Amma, yazıq ki, mahkümlerniñ qıçırıp laf etkenleri ve televizor sesi tüşüncelerge dalmaq ve öz işlerinen oğraşmaq imkân bermey. Amma bütün bu küçlü seslerge ve daima yarıqnıñ yanmansına baqmadan men yahşı yuqlayım.
Yaqınlarım ve başqaları yollağan mektüplerniñ çoqusı maña kelip çıqmağanını ögrendim
Men sportnen oğraşam: immunitetni pekitmek, figura ve vaqıt fayda ile keçirmek içün. Yaqınlarım ve başqaları yollağan mektüplerniñ çoqusı maña kelip çıqmağanını ögrendim. Bütün bu vaqıt devamında men tek 1-2 mektüp aldım. Uzun müddet SİZO hadimlerinden saç qırmaq içün cihaznı bekledik, amma onı öyle de ketirmediler. Bizimki bozuq edi ve men onı tamir etmege qarar ettim. Tamir etip oldım ve biz epimiz birer-birer saçlarımıznı qayrqtıq.
Er sefer, bu belâ halqımıznı nasıl birleştirgenini tüşünip, yüregim qızına. Qırımtatarlar sürgünlikni, cenkni, basqılarnı başından keçirdi ve buña dayanıp oldılar, evlerine qayttılar, gaz, yarıq, dam olmağan çıplaq yerde yerleştiler.
Birisiniñ başına belâ kelgende er kes yardımğa kele edi. Halqımız küçlüdir! Halqımız boysunmağan! Halqımız acayptir.
Qırımda apiske alınğan qırımtatar faali Aziz Ahtemovnıñ beyanatını dekabrniñ 12-nde apayı Adile Ahtemova derc etti.
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.