(Başını mında oquñız)
İstinafnıñ baqılacaq künü keldi. Biz mahkeme oturışında SİZO binasından video bağ ile iştirak ettik. Küçük avası ağır bir oda, sıcaq, yaz. Başlandı saba saat 9-da, aqşam saat 8-de bitti. Soñra daa bir kün. Aqşamğa yaqın bitti. Mahkeme mesleatlaşuv odasına ketti... Qadı keldi ve üküm deñişmez qalacağını ayttı. Biz böyle olacağını bildik.
Keldim kamerağa, yataqqa yattım. Endi 5-nci yıl oturamız, devamı ne? Lager, etap, anda bizni ne bekley? Ne zaman serbet olacaqmız? "Qıyınlıqtan soñ yengillik" özüme deyim. Dünyada er şey Allahtan. Mında apansızdan tüşkenimiz kibi, öyle de azat oluna bilemiz.
İstinaf baqılğanından. Koronavirus testini yaptılar. Demek tezden etap. Saba meni ve Emir-Usein Kukunı sımarladılar. Aşağı tüştik, bizni tinttiler, voronok kelip bizni demiryol vokzalına alıp ketti. Trenge mindik. Adamlar, zekler pek çoq. Sıcaq, bir oda torba, yaz, er bir tamburda 10-15-şer adam, şır suv. Başta Emirnen beraber otura edik, soñra ayrı oturttılar, çünki maddege köre mümkün degil eken.
Tren areket etti. Adamlar de ene, de mine. Er kesnen artıq tanışmayım. Yoruldım. Yuqlamaq isteyim. Bir buçuq künden soñ Râzanğa keldik. Anda bir qaç kün qalacağımıznı ve soñra Başkiriyağa ketecegimizni ayttılar.
Mında apansızdan tüşkenimiz kibi, öyle de azat oluna bilemiz
Endik. Kene tintüv. Saba saat 5. Amamda endi oldıq. Kameralarğa oturttılar. Men endi 2-3 kere oturıp çıqqanlarnen bir kamerağa tüştim. Kimsiñ? Qaydansıñ? Ne içün oturasıñ? kibi sualler. Taaciplendiler. Terrorcığa oşamağanımnı ayttılar.
Çay içtik ve yatıp yuqlamağa istedik. Eki kün yuqusız. Endi yattıp, közlerimni qapattım, soyadımnı eşitem: «Etapqa azırlan. 15 daqqan bar». Emirniñ de soyadını ayttılar. Turıp tez azırlandım. Sağlıqlaştım. Qalğanlardan biri, Andrey: «Yazıq, öyle tez ketesiñ... qave biraz qaldır», dedi. Qaldırdım ve kettim.
Kene tintüv. Voronokqa oturttılar. Vokzalğa keldik. Endik. Trenni bekleymiz. 20 insannıñ qoluna qırçma taqtılar. Epimizni bir-birimizge bağladılar. Yanımızda avtomatçılar ve köpekler. 50 metr keçtik. Yerge yatmaq ve başlarımıznı kötermemek dediler. Trenni bekleymiz. Keldi tren. Mindik. Bizni Emirnen kene ayrı oturttılar. Küpeler kene ağzı burnunen tolu. Pek çoq genç - olar aydutlıq, öldürüv, narkotikler satuvı ile qabaatlana.
20 insannıñ qoluna qırçma taqtılar. Epimizni bir-birimizge bağladılar
Töpege çıqtım. Aşamaq, içmek ve daa çoq yuqlamaq isteyim. Bir saat yuqladım. Aşağı tüştim. Bir adamnen tanıştım. Adı Ramazan, o Dagestandan. Tili pek bizim qırımtatar tilimizge oşay. Laf ettik, qapındıq, çay içtik. Son mene kene yuqarığa köterildim ve pencerege baqıp yuqlap qaldım. Tabiat pek güzel. Uyandım. Ramazan yoq. Ongı başqa küpege avuştırğanlar. Mında ise pek çoq yañı adam. Qayndansız?, - dep soradım. Moskva.Piter. – Ne ile qabaatlanasız? – Aydurtlıq, narkotiler. Student ekende paytahtta yaşap mına böyle olğanlar.
Allah saqlasın, bizim qırımtatar halqımıznı ve olarnı da qorçalasın!
Timur Mutsurayevniñ türküsinden satırlanı hatırladım. Ya menim serbetligimniñ qıymeti ne?
(Devamı bar)
Vadim Siruk, vatandaş jurnalisti, faal, aq qorçalayıcı teşkilâtlar tarafından siyasiy mabüs olaraq tanıldı
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.