2017 senesi. Yaz. Daa bir sıñrlama tedbiri. Qardaşlarım ile körüştim. Muslim Aliyev aytıp bere: "Bugün inanılmaz bir tüş kördim. Aqqan suvğa qarşı büyük bir özen boyunca yaldıp ketem. Suv meni alap kete. Amma ğayret sayesinde men yalığa barıp çıqam. Allahqa şükür!". Netice böyle: davamızda tek ğayret sayesinde ğalebe qazanıp olurmız.
Üç aydan soñ kene başqa kamerağa avuştıralar. Bizimki tamir etile. Saba küneş şavleleri meni uyata. Men yuqarıda yuqlayım. Qapı açılğanını ve birisini kezintige çıqarğanlarını eşitem. Bizim penceremiz, ömürlik apis cezeasına mahküm etilgenler kezgen azbarğa baqa.
Azbarda pek tanış bir ses eşitem: "Takbir Allahu Akbar, Allahu Akbar!". Şübesiz ki, bu Teymur Abdullayev. Men onıñ sesini endi yahşı bilem. Onı da mahsus bloktan kezintige çıqarlar. Anda turnik bar. Teymur sportçudır.
Qıçıram: "Teymur ağa! Nasılsıñ qardaşım?". "Allahqa şükür, er şey yahşı! Seni eşittim, daa yahşı oldım", - dey o. Olarnı, "Aqmescit gruppasını", bizden "Yalta gruppasından" yarım yıl soñra tevqif ettiler. Şu zaman, Aqmescit SİZO-sınıñ mahsus blokunda Enver Mamutov ve Teymur Abdullayev otura edi. Ekisi de 206.5 maddege binaen qabaatlana, "teşkilâtçılar" eken.
Bir qaç yıldan soñ, Enver Mamutovnıñ sözlerinden bildim ki, bir-birinden çoq uzaqta olmağanlarını, iç olmağanda qapıdan laf etip olğanlarını bilmek yenginliktir.
Tahqiqat, cinayet dava ile tanışuv yekünlendi, Rostovğa alıp kettiler, mahkemeler başlandı. Yahşı etip azırlana edik, muracaatlar, daa bir şeyler. Amma mahkemege bu kerek degil, yüzlerinde yazılğan: "Bizim alâqamız yoq, sımarış yuqarıdan".
Cemmat, tuvğanlar, haber vastaları keleler, destekleyler. Biraz yenginlik is etile. Mudafaa tarafına kelgende, mahkeme davanı Qırım prokuraturasına qaytara. Kene tahqiqat, tanışuv, etaplar. "Bağçasaray ve Qurman" gruppalarınıñ mabüslerini artıq apis cezasına mahküm ettiler...
Yañı bir kamerada oturam. Artıq qaçıncı olğanını bile bilmeyim. Semetdeşlerimiz daa ziyade ola. Tirenüvni bastırmaq isteyler. Bütün davalar uydurılğan. Gençlerni tevqif eteler. Amma qartlar da bar. İç kimseni acımaylar. Bu daa ne qadar devam etecek? Daa qaç adam tevqif etilecek?
İnşaAllah bitecek. Sual: qıymeti ne? Qaç taqdir mahv etilecek? Azatlığımıznıñ qıymeti ne? Biz, halqımız serbest yaşamaq, dinini kütmek, siyasiy mevamını bildirmek, adaletsizlik aqqında aytmaq içün daa ne ödemek kerekmiz?
Qırımtatar halqı sürgün etilgen zaman, bunıñ qıymeti yüksek edi. Soñra qaytqan zaman ve 90-ncı senelerden soñ Vatanımızda yaşamaq içün, aqlarımız içün küreştik ve toqtamadıq, şimdi de toqtamaycaqmız, inşaAllah. O zaman qartlar özüni tüşünmediler, balalarını ve torunlarını, olarnıñ kelecegini tüşündiler. Biz de bunı yapmaq kerekmiz...
(Devamı bar)
Vadim Siruk, vatandaş jurnalisti, faal, aq qorçalayıcı teşkilâtlar tarafından siyasiy mabüs olaraq tanıldı
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Rusiye apsinde tutulğan qırımlılar
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisovanıñ kâtibiyeti 2020 senesi noyabr ayında Rusiye tarafından siyasiy sebeplerden taqip etilgen insanlarnıñ sayısı 130 ola, dep bildirgen edi.
Qırım aq qorçalayıcı gruppasınıñ malümatına köre, 2020 senesi oktâbr ayınıñ soñuna qadar eñ az 110 kişi Qırımda siyasiy sebepli ya da diniy cinaiy taqipler çerçivesinde azatlıqtan marum etildi.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.