Link açıqlığı

Saatnıñ esas haberi

Apiske alınğan Riza İzetovnıñ apayı ve doğğan oğlu Aqmescitniñ loqsahanesinden qarşılandı (+foto)


Zeyneb Yazıciyeva yañı doğğan oğlunen
Zeyneb Yazıciyeva yañı doğğan oğlunen

Aqmescitteki №1 loqsahaneden Aqmescitteki ekinci «Hizb ut-Tahrir davası» boyunca qabaatlanğan cemaat imayecisi, faal Riza İzetovnıñ ömür arqadaşı ve yañı doğğan oğlu çıqarıldı. Bu aqta Qırım.Aqiqat mühbiri haber ete.

Zeyneb Yazıciyeva mayısnıñ 14-ne keçer gecesi oğul doğurdı. Oğlançıqqa Muhammed adı berildi. Ana ve balanı bütün Qırımdan tahminen 40 insan qarşılamağa keldi.

«Bugün uydurılğan terrorizm qabaatları boyunca SİZOda tutulğan ve kelip olamağan qardaşımıznıñ oğlunı qarşılamaq içün mında keldik. Bizler, onıñ dindaşları, qorantası ve ana-babasına qoltutmağa keldik», – dep ayttı «Qırım birdemliginiñ» faali Seydamet Mustafayev.

Mayısnıñ 13-nde Rostov-na-Donunıñ Lenin rayon mahkemesi Riza İzetovnı avgustnıñ 15-ne qadar nezaret altında qaldırdı.

Kütleviy tintüvlerden soñ apiske alınğan qırımtatar faali İzzet Abdullayevniñ qızı aprelniñ 2-nde doğdı.

Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.

Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.

OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.

Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG