Martnıñ 27-nde Qırımda keçirilgen kütleviy tintüvlerden soñ apiske alınğan qırımtatar faali Servet Gaziyevniñ sağlıq vaziyeti SİZOda keçirgen eki ay devamında fenalaştı. Bu aqta advokat Ayder Azamatov bildirdi.
İmayeciniñ aytqanına köre, Gaziyev mahkemede aşqazan ve büyrek ağrıları, yürek problemleri aqqında ayttı.
«Onıñ büyük sağlıq problemleri bar. Qadı oña muracaat etkende zornen tura edi. Soñra suallerge oturıp cevap bermesi içün izin istedik. Servet Gaziyev qadığa muracaat etip, yaşına emiyet bermege ve soñki yıllarını qorantasınen beraber keçirmesine imkân bermesini rica etti», – dep tarif etti Azamatov.
Advokatnıñ bildirgenine köre, Rostov vilâyetiniñ SİZOsında eki ay keçirgen Aqmescitteki ekinci «Hizb ut-Tahrir davasınıñ» 23 mabüsi ile tahqiqat tahqiqat tedbirlerini keçirmedi.
«Qabaat tarafı tahqiqat tedbirleri keçirilmek, ekspertiza qararlarınen tanıştırmaq, bu ekspertizalarnı keçirmek içün sıñırlav tedbiri uzatılmalı, dep bildirdi, amma eñ esası – tahqiqat tutulğan künü, martnıñ 27-28-nden, bugünge qadar eki ay içinde olarnen bir de bir tahqiqat tedbirleri keçirilmegenini aytmadı. Olar anda boşuna oturdılar, demek», – dep qoştı Azamatov.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
