Cumaaqşamı künü, mayısnıñ 27-nde, Aqmescitteki ekinci «Hizb ut-Tahrir davasınıñ» mabüsi Servet Gaziyev 60 yaşını toldurdı, o, Rusiyeniñ Rostov-na-Donu №5 SİZOsında buluna ve tibbiy yardımğa muhtacdır, dep bildirdi advokat Nikolay Polozov.
Polozovnıñ qayd etkenine köre, «terrorizmde» qabaatlanğan Gaziyev 2019 senesi mart ayından apiske alınğan soñ bir qaç mahkeme oturışuvında «acele yardımğa» muhtac oldı.
«Gaziyevniñ sağlıq problemleri bar. Mahkeme salonına muntazam sürette «acele yardım» çağırıla. Bazıda oturışuv vaqtında bir qaç kere ola. Ekimler ağrı kesecek ine urıp kete. Apiste bulunğan eki yıldan berli öyle ola. Advokatı Ayder Azamatov müvekkiline tibbiy yardım kösterilsin ve ekimler baqsın dep, eñ az bir kâğıt sarğılıq yazıp sarf etkendir. Soñki mahkemede, mayısnıñ 20-nde, zenaatdaşımnıñ aytqanına köre, müvekkili yaramadı, özü turıp olamadı ve büyügen qara cigerini is ete edi. Qız qardaşı ve advokatı daa Aqmescit SİZOsında olğanda hastahanege yatırılsın dep küreş etti. Şimdi Rostov-na-Donu şeeriniñ №5 SİZOsında buluna. Kerekli tibbiy yardım bir kere bile kösterilmedi. Onıñ diagnozı bile qoyulmadı. İnsannıñ içekleri, yüregi ağıra. Büyrek ve qara cigeri ağıra. Tiş problemleri bar. Hastalıqlarnıñ büyük qısmını, ebet, apiste qazandı», – dep yazdı Polozov Facebook haberinde.
Advokat, Servet Gaziyevniñ saqatlıq derecesi yoq, amma tibbiy yardım ve teşkerüv ihtiyacı bar, dep qoştı.
Rostov vilâyeti Rusiye İnsan aqları vekâletlisiniñ apparat reberi Vladimir Nekrasov Aqmescitteki ekinci «Hizb ut-Tahrir davasınıñ» mabüsi Servet Gaziyevniñ sağlıq vaziyeti fenalaşqanı içün tibbiy teşkerüv keçirmek talabınen muracaat yolladı. Ukraina ombudsmanı Lüdmila Denisova Rusiye insan aqları vekâletlisi Tatyana Moskalkovağa muracaat etip, Gaziyevniñ aqlarını ğayrıdan tiklemege, oña kerekli tibbiy yardım köstermege ve sağlıq vaziyeti sebebinden sıñırlav tedbirini deñiştirmege talap etti.
Rostov-na-Donu (Rusiye) mahkemesi yaramağan dava mabüsi Servet Gaziyevniñ sağlıq vaziyeti sebebinden Aqmescitteki ekinci «Hizb ut-Tahrir davasınıñ» oturışuvını başqa künge qaldırğan edi. Oña yatıp raatlanmağa tevsiye etilgen edi.
Mayısnıñ 13-nde Rostov-na-Donu mahkeme oturışuvında Servet Gaziyev yaramağan edi. «Acele yardım» feldşeri bir qaç ağrı kesici ine urdı, amma Gaziyev mahkeme soñuna qadar raatsızlanğan edi. Martnıñ 30-nda Gaziyevniñ aşqazan ağrıları sebebinden de mahkemege «acele yardım» çağırılğan edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
