Qırımnıñ Rusiye başı Sergey Aksönov Qırımda «kesen-kes» siyasiy mabüsler yoq, dep bildirdi. Bunı o «Rossiya-24» telekanalına intervyü vaqtında Ukraina prezidenti Volodımır Zelenskıynıñ ABD devlet başı Jo Bidenge Qırım ve Donbastaki siyasiy mabüsler cedvelini bermesini tefsir etip ayttı.
«Qırımda kesen-kes siyasiy mabüsler yoq. Tahqiqat altında olğanlar ve cinayet içün mahküm etilgenler bar. Avropa Birliginden ve diger çetel memleketlerden kim kelse, subet şahıslarğa kelgende , yalıñız umumiy laflar, "er şey yahşı, siyasiy mabüsler". Men deyim: "Meselege keçe bilesizmi? Şahsiyetler", ve bu yerde er şey bite. Pek çoq aytılğan bir, ya da eki soyadı. Olar ise cinayetnen qabaatlanalar. Yazıq ki, biz siz ile bu papkanı körse edik, kim anda: olarnıñ dostları, tanışları ve ilâhre», – dedi Aksönov.
Bundan ğayrı, o, «gaz borusında diversiya yapqanından» şübheli sayılğan qırımtatar faali Nariman Celâlnıñ apiske alınmasını tefsir etti.
«Bu Meclisniñ agenti, çetel mahsus hızmetleriniñ agenti. Başqa türlü aytamam. Mahke oturışı neticelerine köre er şey belli olacaq. O, Ukraina Mudafaa nazirliginiñ Baş istihbarat idaresinden vazife aldı, olar ise Vaşingtondan. Bu episi bağlı», – dep saya Aksönov.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete. Advokat Nikolay Polozovnıñ sentâbrniñ 8-nde bildirgenine köre, imaye Rusiye kontrolindeki Aqmescit mahkemesiniñ qırımtatar faali Nariman Celâlnı apiske almaq qararını şikâyet etti.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı «Ukraina Mudafaa nazirliginiñ Baş istihbarat idaresi teşkil etti», dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina Tış işler naziri Dmıtro Kuleba sentâbrniñ 6-nda Ukrainanı ziyaret etken Amerika kongressmenlerine Qırımda keçirilgen yañı tintüv ve tutuvlar aqqında tarif etip, olarnı yarımadada basqılarnı toqtatmaq maqsadınen Kremlge qarşı basqı quvetleştirüvde yardım etmelerine çağırdı.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
