Qırımnıñ Rusiye yolbaşçısı Sergey Aksenov afu soramasını talap etken siyasiy mabüslerniñ ana-babaları ve qırımtatar milliy areketiniñ veteranlarına çıqmadı.
Olarnıñ bildirgenine köre, Aksenov qırımtatar halqını terrorizmde qabaatladı.
Laf Aksenovnıñ Facebookta yazğanları aqqında kete. O, «Hizb ut-Tahrir davası» boyunca musulmanlarnıñ tutulmasını izaatladı. FSB areketlerini «terrorizm ve ekstremizm ile küreş» dep adlandırdı.
Veteranlarnıñ yanına Qırımnıñ Milletlerara munasebetler işleri devlet komitetiniñ yolbaşçısı Albert Kangiyev çıqtı. O, odasına keçip, bütün meselelerni laf etmege teklif etti. Soñra Kangiyev olarnıñ ricalarını Aksenovğa yetkizecek, dep söz berdi.
«Sergey Valeryeviç çıqmaycaq, konstruktiv bir dialog olmasını isteseñiz, yapılacaq areketlerni teklif ettim. Meni qararnı seslendirgen insan olaraq qabul etmeseñiz, bu siziñ qıyınlıqlarıñızdır. Normal dialog yolunen ketmege qarar bersek, qarar almaq kerekmiz», – dedi Kangiyev.
Toplaşqan qırımtatarlar memurnen qavğa etken soñ er kes dağıldı.
İyülniñ 8-nde qırımtatar milliy areketiniñ veteranları Nazirler Şurası binasına kelip, Aksenovnen körüşmege istegenini endi bildirgen edi. Başta Qırım ükümetiniñ apparat hadimi yanlarına çıqtı. Аksenovnıñ qırımtatarlarnıñ evlerinde keçirilgen tintüvler, tutuluvlar ve apiske aluvlarınen alâqası yoq, dep ayttı. Qırımnıñ Rusiye iç siyaseti, malümat ve bağ naziri Mihail Afanasyev de toplaşqanlarnıñ yanına çıqıp, Aksenov ükümet binasında degil, dep bildirdi.
İyülniñ 7-nde saba erte qırımlılarnıñ evlerinde tintüvler keçirildi: Emil Ziyadinov, İsmet İbragimov, Alim Sufyanov, Seyran Hayretdinov, Aleksandr Sizikov, Vadim Bektemirov, Zekirya Muratov ve Aluştada Dilâver Memetov. Memetov tintüv vaqtında evde degil edi, onı qıdırmağa devam eteler, dep bildire «Qırım birdemliginiñ» faalleri.
Rusiye FSBsiniñ malümatına köre, mahsus hızmetniñ hadimleri Qırımda «Hizb ut-Tahrirni» teşkil etkeninden ve iştirak etkeninden şübheli sayılğan yedi insannı tuttı.
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.
Ukraina Tış işler nazirligi beyanatını derc etip, «qırımtatarlarnıñ evlerinde keçirilgen yañı qanunsız tintüvler ve tutuvlarnen bağlı narazılığını» bildirdi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
