Link açıqlığı

Saatnıñ esas haberi

Qırımtatar areketiniñ veteranları Aksenovdan Nazirler şurasınıñ binası ögünde afu soramasını talap ete (yayın)


Qırımdaki Rusiye parlamentiniñ binası ögünde qırımtatarlarnıñ mitingi

Qırımtatar milliy areketiniñ veteranları iyülniñ 7-nde Qırımda çoqusı qırımtatarı olğan musulmanlarnıñ evlerinde keçirilgen tintüvler sebebinden Qırımnıñ Rusiye ükümet binası ögüne keldi. Bu aqta canlı yayın yapqan «Qırım birdemligi» haber ete.

Toplaşuv iştirakçileri Qırımnıñ Rusiye yolbaşçısı Sergey Aksenovnen körüşmege istey. Miting iştirakçilerine Qırım ükümetiniñ apparat hadimi çıqtı. Onıñ aytqanına köre, Aksenovnıñ qırımtatarlarnıñ evlerinde keçirilgen tintüvler, tutuluvlar ve apiske aluvlarınen alâqası yoq.

«Aksenov aytqanları içün cevap berip afu soramalı», – dep ayttı körüşüv iştirakçileri. Laf Aksenovnıñ Facebookta yazğanları aqqında kete. O, FSBge Rusiyede yasaqlanğan «Hizb ut-Tahrir» teşkilâtında iştirak etkeninde qabaatlanğan musulmanlarnı tutqanı içün teşekkürler bildirdi.

Qırımnıñ Rusiye iç siyaseti, malümat ve bağ naziri Mihail Afanasyev de toplaşqanlarnıñ yanına çıqıp, Aksenov ükümet binasında degil, dep bildirdi. Onıñ aytqanına köre, o, Aksenovnen laf etti ve o, miting iştirakçilerinden oña kelecek beş insannı belgilemelerini rica etti. Faqat toplaşqanlar Aksenov qırımtatarlarnıñ yanına özü çıqmalı, dep ayttı.

Tintüvler iyülniñ 7-nde saba erte yedi qırımlınıñ evinde keçirildi: Qurman rayonınıñ Büyük Onlar qasabasında yaşağan Emil Ziyadinov, Aqmescit rayonınıñ Kurtsı qasabasında yaşağan İsmet İbragimov, Bağçasaray rayonınıñ Jeleznodorojnoye köyünde yaşağan Seyran Hayretdinov, Bağçasaray rayonınıñ Sevastyanovka köyünde yaşağan Aleksandr Sizikov, Aqmescit rayonınıñ Bavurçı (Kamenka) qasabasında yaşağan Vadim Bektemirov ve Aluştada yaşağan Dilâver Memetovnıñevinde. Memetov tintüv vaqtında evde yoq edi, onı qıdırmağa devam eteler.

Rusiye quvetçileri qırımlılarnıñ evlerini tintti, altı kişi tutuldı (video)
Bekleñiz, lütfen

No media source currently available

0:00 0:04:09 0:00

Rusiye FSBsiniñ malümatına köre, «Qırım sakinleri arasında terror mefküresini yayğan, qırımlı musulmanlarnı özüne celp etken» «Hizb ut-Tahrir» bölügini qurğanından ve iştirak etkeninden şübheli sayılğanlar tutuldı. Rusiye mahsus hızmetiniñ matbuat hızmeti bildirgenine köre, «(teşkilât) azalarınıñ yaşağan yerlerinde Rusiyede yasaqlanğan «Hizb ut-Tahrir al-İslami» propaganda malümatı, terror faaliyeti vaqtında qullanğan elektron malümat taşıyıcıları» alındı.

Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG