Rusiye kontrolindeki Qırım yolbaşçısı Sergey Aksenov, koronavirus telükesi sebebinden Qırımnıñ Rusiye medeniyet nazirligine aprel ayında turist aqınını arttırmasından vazgeçmege emir etti.
Bu aqta o, martnıñ 25-nde Qırımda bu yuqunçnıñ tarqaluvına qarşı operativ ştabınıñ toplaşuvında ayttı.
«Men aprel ayında turist aqınınıñ arttırıluvını talap etmege tevsiye etmez edim. Bu olacaq mevsimni boza bile. Aprel ayında muqayt olsaq yahşı olur. Aprel ayında bunıñnen bağlı bir bazarlıq olmaz, mayısqa qadar», – dedi Aksenov.
Toplaşuvda Qırımdaki şifahane-kurort tedaviylenüvi de toqtatıla bile, dep haber etildi.
Bundan evel Qırımnıñ Rusiye akimiyeti gece klubları, diskoteka, kinoteatr, kinosalonı, bala odaları, bala eglence merkezleri ve diger işten boş vaqıt keçirilgen yerlerniñ faaliyetini toqtatmaq niyeti aqqında bildirdi.
Martnıñ 24-nde Rusiyedkki koronavirus yuqunçınen küreş operativ ştabı regionlarnıñ akimiyetlerine kinoteatr, gece klubları, diskoteka ve bala oyun merkezlerini qapatmağa, qave, bar ve restoranlarda nargile içilüvini yasaqlamağa tevsiye etti.
Martnıñ 24-nde Aksenov Qırımda altı yañı koronavirus hastası qayd etildi, dep ilân etti. Daa evel Qırımnıñ Rusiye akimiyeti ilk COVID-19 hastası bar dep tasdıqladı.
Aksenov, koronavirus tarqalğan memleketlerge barıp, bunı gizlegen insanlarğa qarşı cinaiy dava açılmasını talap etmege azır. O, yarımadağa Herson vilâyetiniñ memuriy sıñırından kirgen qırımlılar üzerinde monitoringni quvetleştirmege talap etti.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
