Qırımda koronavirus pandemiyası sebebinden ilân etilgen özüni izolâtsiya etüv rejimi mayısnıñ 31-inece uzatıldı.
Sergey Aksönovnıñ bu buyruğı Qırımnıñ rusiyeli internet portalında yerleştirildi.
"Mayıs 11-inece" sözlerini "mayıs 31-inece"ne deñiştirmek", - denile vesiqada.
Ve bu buyruqnen mayısnıñ 12-sinden itibaren Qırımda mecburiy maska rejimi kirsetile.
Qırımlılar evelkisi kibi sadece çöplük taşlamaq, ev ayvanlarını kezdirmek, eñ yaqın tükânğa barıp kelmek içün, sağlıq ya da ayat telükesi olsa ve izinnameleri olğanlar işke barmaq içün evlerinden çıqa bile.
Soñki 24 saat içinde Qırımda doquz yañı COVID-19 adisesi qayd etildi.
Al-azırda Qırımda 177 koronavirus hastası bar. 22-si çetelden keldi, 18-i – Rusiyeden. 23 insan Rusiyeden kelgenlernen alâqada edi, 114-ü laboratoriyada tasdıqlanğan hastalarnen alâqada oldı. 44 insan tüzeldi. Bir koronavirus hastası vefat etti. Aqyarda 110 COVID-19 hastası bar, eki kişi vefat etti.
Qırımda mayısnıñ 12-nden itibaren koronavirus yuqunçına oğrav telükesi sebebinden mecburiy maska rejimi kirsetile.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
