YouTube, Mixcloud, Anchor Spotify, Google Podcasts -da Valeriy Vozgrinniñ dört tomlıq «Dünyalar. Halqlar. Qırımtatar tarihı» neşiriniñ ukrain tilinde ses kitabı yayınlandı.
«Müelliften», «Kiriş sözü», ve «I-nci bölük» qısımlarnı artıq diñlemek mümkün. Biraz soñra ses kitabınıñ diger bölükleri de peyda olıp başlaycaq, olarnıñ arasında «Qırımnıñ devletçilik yaşayışı» (Qırım Hanlığı), «XVII asırda Qırım ve Zaporijjâм, «İlhaq», «Sürgünlikм.
Leyhanıñ brend sesi Ukrainada nam qazanğan artist, ukrain teatr, kino ve dublâj aktörı Andriy Saminin oldı. Leyhağa Emine Ceppar, Ahtem Seitablayev, İvan Len, Sevgil Musayeva, Eskender Bariyev, Elmaz Asan, Nulsum Halilova, Ayder Mujdabayev, Elvina Zeynedinova, Bogdan Benük qoşuldılar.
«Velıka İdeya» saytında tarihçı Valeriy Vozgrinniñ dört tomlıq «Dünyalar. Halqlar. Qırımtatar tarihı» neşiriniñ ses kitabını azırlamaq içün para toplandı.
Qayd etilgenine köre, leyhağa 213 insan qol tuttı. Umumen 148 250 ğrıvnâ toplandı. Kitapnı 2021 senesiniñ başında diñlemege mümkün olacaq.
Tarihçı Vozgrin kitap üzerinde 25 yıl devamında çalıştı.
Kitapta müellifniñ tedqiqat malümatları (tarih, turmuş, qadimiy zamanlarnıñ qırımtatar ananeleri), arhiv vesiqaları ve keçmişniñ çetel tarihçı seyaatçılarınıñ qısqa yazma tasvirleri bar.
Valeriy Vozgrin – tarihiy ilimler doktorı, Sankt-Peterburg devlet universiteti Yañı ve eñ yañı zaman tarihı bölüginiñ professorı, «Menşikovskiy institut» ilmiy-tedqiqiy merkeziniñ müdiri, Qıral dan ilimler akademiyasınıñ azası, yañı diplomatiya, Rusiye, Avropa, Skandinav memleketleri, Grenlandiya tarihınen bağlı 187 ilmiy maqaleniñ müellifidir. Onıñ ilmiy işleri Ukraina, Danimarka, Norvegiya, Almaniya, Estoniya, Finlândiya, Türkiye, İtaliya, Rusiyede derc etildi. Vozgrin 2020 senesi yanvarniñ 10-na keçer gecesi Sankt-Peterburgda vefat etti.
