«Velıka İdeya» saytında tarihçı Valeriy Vozgrinniñ dört tomlıq «Dünyalar. Halqlar. Qırımtatar tarihı» neşiriniñ ses kitabını azırlamaq içün para toplandı.
«İleride – zametli, itinalı, mündericeli iş, amma 3 ay içinde bu leyha ukrainler ve qırımtatarlar içün pek emiyetli olğanını añladıq. Kampaniyağa farqlı dünya (zenaat ve şahsiyet) insanlarınıñ qoşulğanı müim: qoranta, dost, işdeş, media hadimleri, lâqayt olmağan jurnalistler, cemaat erbapları, olar Vozgrinniñ iş parçalarını endi seslendirdi», – dep aytıla kitapnıñ Facebook saifesinde.
Qayd etilgenine köre, leyhağa 213 insan qol tuttı. Umumen 148 250 ğrıvnâ toplandı. Kitapnı 2021 senesiniñ başında diñlemege mümkün olacaq.
Tarihçı Vozgrin kitap üzerinde 25 yıl devamında çalıştı.
Kitapta müellifniñ tedqiqat malümatları (tarih, turmuş, qadimiy zamanlarnıñ qırımtatar ananeleri), arhiv vesiqaları ve keçmişniñ çetel tarihçı seyaatçılarınıñ qısqa yazma tasvirleri bar.
Valeriy Vozgrin – tarihiy ilimler doktorı, Sankt-Peterburg devlet universiteti Yañı ve eñ yañı zaman tarihı bölüginiñ professorı, «Menşikovskiy institut» ilmiy-tedqiqiy merkeziniñ müdiri, Qıral dan ilimler akademiyasınıñ azası, yañı diplomatiya, Rusiye, Avropa, Skandinav memleketleri, Grenlandiya tarihınen bağlı 187 ilmiy maqaleniñ müellifidir. Onıñ ilmiy işleri Ukraina, Danimarka, Norvegiya, Almaniya, Estoniya, Finlândiya, Türkiye, İtaliya, Rusiyede derc etildi. Vozgrin 2020 senesi yanvarniñ 10-na keçer gecesi Sankt-Peterburgda vefat etti.
