Yanvarniñ 10-unda gece Sankt-Peterburda tarihçı, professor, qırımtatar halqınıñ tarihiniñ tetqiq eserleriniñ müellifi, Qırımtatar halqı Qurultayınıñ II çağırışınıñ (1991-1996) delegatı Valeriy Vozgrin vefat etti.
Bunı Qırımtatar Milliy Meclisiniñ reisi Refat Çubarov haber etti.
Onıñ yazğanına köre, daa yanvarniñ 7-sinde Vozgrinniñ insultnen hastahanege qoydılar.
"Bizim içün Valeriy Yevgenyeviç, "Qırım ve qırımtatarlar" ibaresi daa yasaq olğanda, dünyağa halqımıznıñ tarihını köstergen adam ve alim kibi ebediyen qalacaq", - yazdı Facebookta Qırım jurnalisti Lilâ Bucurova.
O, Aqmescitte doğğan Vozgrin "Qırımtatar halqınıñ tarihi" dört cıltlı eserler toplamınıñ müellifi olğanını hatırlattı. O bu kitaplar üzerinde 20 yıldan çoq çalıştı.
"Valeriy Yevgenyeviç ölüminden soñ da Qırımdan ayırılmağa istemedi. O külüniñ yarısını Qırım toprağında defn etmek, başqasını ise Sankt-Peterburgda kömmege vasiyet etti", - yazdı Bucurova.
Valeriy Vozgrin - tarih ilimleriniñ doktorı, Sankt-Peterburg devlet universitetiniñ Yañı zaman tarihı kafedrasınıñ professorı, "Menşikov institutı" tetqiqat merkeziniñ müdiri, Qıral dan İlimler Akademiyasının azası, 187 ilmiy eserniñ müellifidir.
