Qırımlı advokat Rustem Kâmilev Aqmescitteki mahkeme binası ögünde tutulğan 15 qırımtatar faaline kirsetilmedi. Bu aqta «Qırım birdemligi» cemaat birleşmesi Qırım.Aqiqatqa bildirdi.
Olarnıñ malümatına köre, tutulğan faaller Aqmescitniñ №2 «Kiyevskiy» polis bölüginde buluna. Kâmilevniñ imayeci şeadetnamesi ve statusı olsa da, onı añlaşma tizmek içün içeri almadılar.
Advokat Rusiye quvetçilerine müvekkillerinen añlaşma tizilgende yanlarında olmamağa teklif etti, tek mesleat içün kirsetmelerini rica etti, amma buña da razı olmadılar.
«Bir şey añlamadım: bunı yapmağa olmay, çünki er kesniñ uquqiy yardım aqqı bar», – dep tefsir etti Kâmilev.
Berilgen malümatqa köre, tutulğanlarğa qabaatları öyle de aytılmadı, endi bir qaç saattan berli bölükte bulunalar.
Aqmescitniñ №3 «Merkeziy» polis bölüginde qırımtatar faallerinen imayeci Lilâ Gemeci çalışa. Polis onıñ kirmesine keder etmedi.
Aqmescitteki mahkeme ögünde oktâbrniñ 29-nda Rostov-na-Donuda ükmü çıqarılğan Bağçasaraydaki «Hizb ut-Tahrir davasınıñ» mabüslerine qoltutmağa kelgen eñ az 30 qırımtatar faali tutuldı.
Rostov-na-Donu Cenübiy okrugınıñ arbiy mahkemesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Advokatlar, ükümge qarşı istinaf şikâyetlerini berecek, dep bildirdi.
Ukrainanıñ Rostov-na-Donu konsulı Taras Malışevskiy, Ukraina tarafı bu ükümge lâyıq cevap berecek, dep ayttı.
Qırım sakinleri bu dava mabüslerine qoltutmaq içün fleşmob keçirdi ve dua yaptı, cuma künü Rostovdaki mahkeme binası ögünde onlarnen qırımlı toplaşıp, dava mabüslerini azat etmege çağırdı.
Rostov-na-Donu (Rusiye) Cenübiy okrugınıñ arbiy mahkemesinde Rusiye qabaatlavınıñ vekilleri oktâbrniñ 20-nde Bağçasaraydaki «Hizb ut-Tahrir davasınıñ» dört mabüsi içün 66 yıllıq apis cezasını talap etti.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
