Rostov-na-Donuda Bağçasaraydaki «Hizb ut-Tahrir davası» boyunca çıqarılğan üküm sebebinden Aqmescitte Rusiye kontrolindeki Qırım garnizon mahkemesiniñ binasına kelgen insanlar tutula. Bu aqta «Qırım birdemligi» cemaat birleşmesi Qırım.Aqiqatqa bildirdi.
Faallerniñ ilk malümatına köre, Qırımda Rusiye quvetçileri 28 insannı tuttı. Aqmescitte video çıqarğan jurnalistler avtozak içine alındı.
Faallerniñ bildirgenine köre, 15 insannı №3 «Merkeziy» polis bölügine, qalğanlarnı – №2 «Kiyevskiy» polis bölügine.
Rusiye quvetçileri insan tutuvlarını tefsir etmey.
Cuma künü, oktâbrniñ 29-nda, Rostov-na-Donuda qırımtatarlar Bağçasaraydaki «Hizb ut-Tahrir davası» mabüsleriniñ ükmüni çıqarğan mahkeme ögünde toplaştı. Rusiye qabaatlav tarafı dört kişi içün 66 yıl apis cezasını talap etti. Mahkeme qırımlılarğa 12 yıldan 17 yılğa qadar apis cezalarını berdi.
Oktâbrniñ 25-nde Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
