İşğal etilgen Qırımda Rusiye advokatı Aleksey Ladin yarım ayğa apiske alındı. O, qırımlı siyasiy mabüslerniñ imayecisi olaraq belli. Aq qorçalayıcılar ve Aleksey Ladinniñ sabıq müvekkilleri onıñ apiske alınmasını Qırımda Rusiye mahsus hızmetleri tarafından advokatlarğa qarşı yapılğan ve Rusiyeniñ Ukrayınağa qarşı arbiy istilâsı başlağanından faalleşken sistematik basqınıñ devamı dep tüşüne.
Aleksey Ladin Rusiyeniñ Omsk şeerinde dünyağa keldi. Tümende yaşap çalıştı. Keçmişte Rusiye milisiniñ zabiti, operativ hadimi 2015 senesi «Agora» halqara aq qorçalayıcı teşkilâtınıñ vekili qırımlılarnı qorçalap başladı. Onıñ müvekkilleri – Rusiyede repressiv tedbirler çerçivesinde terror ve ekstremiz ile küreş maddelerine istinaden qabaatlanğan insanlar.
Qırımnıñ Rusiye işğalinden soñ regionda böyle davalar çoq oldı ve advokat qorantasınen beraber Qırım yarımadasına köçip keldi. Bu vaqıt devamında qırımlı siyasiy mabüslernen onlarnen rezonanslı cinaiy davadan keçti. Şimdi belâ onıñ başına da keldi.
«Maqsatlı cezalav»
Aqmescitte Aleksey Ladinniñ tutuluvı aqqında oktâbrniñ 13-nde belli oldı. O künü Rusiye uquq qoruyıcıları Aqyardaki evini tintti. Onı eki memuriy davağa köre qabaatladılar: Rusiye Silâlı quvetlerini itibardan tüşürüv (Rusiye Memuriy uquq bozuvları kodeksiniñ 20.3.3 maddesi) ve Rusiyede terror teşkilâtı dep tanılğan Noman Çelebicihan batalyonınıñ timsallerini numayış (Rusiye Memuriy uquq bozuvları kodeksiniñ 20.3).
Rusiye uquq qoruyıcıları bu maddelerni qırımlılarğa nisbeten kütleviy şekilde qullana. Hususan, uquq qoruyıcılar Rusiye Federatsiyasınıñ Memuriy uquq bozuvları kodeksiniñ 20.3.3 maddesine istinaden memuriy protokollarnı Rusiyeniñ Ukrayınağa qarşı büyük istilâsınen açıq şekilde razı olmağanlarğa qarşı tize.
Aleksey Ladinge 14 kün memuriy apis cezası ve 45 biñ ruble para cezası berildi.
Advokat qabaatını tanımay ve qabaatlavlar saçma dep samâ, dep bildirdi qırımlı zenaatdaşı ve mahkemedeki vekili Emil Kurbedinov Qırım.Aqiqatqa. O, apis cezası qararını Rusiye kontrolindeki Qırım Yuqarı mahkemesine şikâyet etti. Onı oktâbrniñ 17-nde baqmağa planlaştıralar.
Advokat Aleksey Ladin davasında «açıq siyasiy alâmetler» aqqında ayta.
Malümat ve mahkeme qararlarını incelep, maqsatlı cezalav olğanını añlayımEmil Kurbedinov
«Aleksey iş faaliyeti içün taqip etile. Malümat ve mahkeme qararlarını incelep, maqsatlı cezalav olğanını añlayım. Çünki Qırımdaki Rusiye İç işler nazirliginiñ Ekstremizm ile küreş merkezi hadimleriniñ ve mahkeme qararlarınıñ uquq ve qanunlarnen bir alâqası yoq. Mahkeme biñ ruble cezası olğan maddege istinaden advokatnı 14 künge apiske alıp, Alekseyniñ qabaatsız olğanına degil, ekstremizm ile küreş merkezi hadimleriniñ «yahşı niyet prezumptsiyasına» ve tizgen vesiqalarına esaslana. Mahkeme Alekseyni qabaatsız olğanını isbatlamağa mecbur olğan alğa oğrata. Qanun ise devletke insan qabaatını isbatlamağa ve mahkemede uquq qoruyıcılarnıñ degil, vatandaşlarnıñ qabaatsız ve yahşı niyetli olğanını esaslanmağa ayta», – dep bildirdi o.
«Özüni cenknen itibardan tüşürgenlerni itibardan nasıl tüşürmek mümkün?»
Eki madde advokatqa Facebookta paylaşqanları içün berildi. Aleksey Ladinniñ zenaatdaşları bildirgenine köre, böyle paylaşuvlardan biri 2022 senesi mart ayında derc etildi. #Cenkkeyoq hashtaginen Rusiyeniñ Ukrayınanı bombardığanına dair ikâye bağlantısını paylaşqan edi.
2018 senesi diger paylaşuvda Ukrayınanıñ tuğrası, qırımtatar tamğası ve «Boysunmağan» yazısınen fotoresim bar edi.
Daa bir paylaşuvda Ukrayınanıñ tuğrası, qırımtatar tamğası ve «Terrorist degilmiz! Ekstremist degilmiz» yazısınen yazuvlı şiar fotoresimi bar edi.
Bu yazuvlı şiarnı Aqmescit SİZOsında qırımtatar faali, ekstremizmde qabaatlanğan sabıq siyasiy mabüs ve advokatı Aleksey Ladin olğan İsmail Ramazanov sızğan edi.
Faal Aleksey Ladinni «qorantasınıñ dostu» dep adlandıra.
«Sayesinde azatlıqtan olğan İmayecim. Onı «Rusiye ordusını itibardan tüşürgeninde» qabaatlaylar. Avropanıñ merkezinde cenk başlatıp, özüni itibardan tüşürgenni daa nasıl itibardan tüşürmek mümkün? Bu Ukrayına satqınlarınıñ işi, dep tahmin ete bilem. Namus ve menlik adamına azatlıq», – dedi o.
«Risk almağa mecbur olamız»
Qırımda çalışqan aman-aman on yılı devamında Aleksey Ladin Rusiye mahkemelerinde onlarnen qırımlı siyasiy mabüsni temsil etti. Soñki yılları terrorizm ve ekstremizde qabaatlanğan qırımtatarlarnıñ imayecisi edi. Müvekkilleri arasında – aluştalı jurnalist Aleksey Nazimov, «Qırım birdemliginiñ» faali Gülsum Aliyeva, qırımtatar faali Edem Bekirov, «Hizb ut-Tahrir» davaları boyunca qabaatlanğanlar, Herson vilâyetinde hırsızlanğan ve Qırım SİZOsına zornen ketirilgen Ukrayına Arbiy deñiz quvetleriniñ zabiti Aleksey Kiselev ve digerleri.
Aleksey Ladin Qırım.Aqiqatnen soñki sefer bir ay evelsi subetleşken edi. O, Qırımda demiryolda diversiya sebebinden apiske alınğan qırımlı sportçı Kirill Barannik davası aqqında tarif etken edi.
Advokat baqqan davalarnıñ bir qısmı toqtatıldı, bazı maddeler deñişti. Bazı davalar federal qanunlar liberalleştirilgeni içün qapatıldı.
Böyle davalarda çalışsam, bazı telükelerni köz ögüne almaq kerekAleksey Ladin
Aleksey Ladin gizlemey: Rusiye qanunları ve siyasiy kerçekler şu ki, ekstremizm ve terrorizm ile küreş maddeleri boyunca aqlayıcı üküm almaq aman-aman imkânsız, mahkeme qararınıñ yımşatıluvını ise zafer dep saymaq mümkün.
Qırım.Aqiqatqa aytqanına köre, işiniñ telükeli olğanını añlay, amma risklerge baqmadan devam ete.
«Başım çalışmay degil. Qaşqırlardan qorqsañ, ormanğa baramazsıñ. Böyle davalarda çalışsam, bazı telükelerni köz ögüne almaq kerek», – dep ayta Aleksey Ladin.
«İmaye fiyatı – özüniñ telükesizligi»
Qırımlı aq qorçalayıcı Lutfiye Zudiyeva advokat Aleksey Ladinniñ faaliyetini sovetler vaqtında qırımtatarlarnıñ imayeciler tecribesinen qıyaslay.
Aleksey Ladin sovetler vaqtında qırımtatarlarnı qorçalağan advokat Nikolay Safonovnı añdıraLutfiye Zudiyeva
«Qırımtatarlar içün yaqın ve Rusiye mahkeme sisteması içün kelişmegen oldı. Aleksey Ladin sovetler vaqtında qırımtatarlarnı qorçalağan advokat Nikolay Safonovnı añdıra – telükesizligini feda etip. Ladinniñ Facebook saifesi – Safonovnıñ yazılarınen aynı, tek daa qısqa ve pek farqlı insanlarnen. Oğrağan tarihiy sarmallarımızğa şaşam», – dep qayd ete Lutfiye Zudiyeva.
Aleksey Ladinniñ taqip etilüvi Qırımda mustaqil advokatlarğa qarşı şekillengen tendentsiyanıñ devamı oldı. Olar Rusiye uquq qoruyıcıları tarafından basqını daa evel de is etken edi. Olarnı tuta, sorğuğa çeke, çeşit manaçıqlarnen apiske alına edi ve ilâhre. Rusiye Ukrayınağa qarşı büyük istilâ başlatqan soñ ise advokatlarğa qarşı usullar sertleşti.
2022 senesi yazda üç qırımlı advokat – Lilâ Gemeci, Rustem Kâmil ve Nazim Şeyhmambetov – qırımlı siyasiy mabüslerniñ mahkeme esnaslarında çalışıp, advokat faaliyetine izin bergen litsenziyasız qaldırıldı.
Advokatlar Emine Avamileva, Ayder Azamatov, Nazim Şeyhmambetov, Edem Semedlâyev ve Emil Kurbedinov memuriy apiske alınğan edi.
Episi bunı iş faaliyetlerinen bağlay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
