Qırım.Aqiqat Qırımda tevqif etilgen qırımtatar faali, siyasetçisi ve jurnalisti Nariman Celâlnıñ mektüplerini yayınlay
Cinayet davasınıñ materiallarınen tanışqan soñ, tasdıqlay bilem ki, menim tevqifim bir insannıñ, jurnalistniñ, cemaat erbabınıñ fikrini serbest bildirgeni ve Qırımda Ukraina vatandaşalrınıñ meraqlarını qorçalağanı içün qanunsız taqip etilüvdir.
Menim tevqifim bir insannıñ fikrini serbest bildirgeni ve Qırımda Ukraina vatandaşalrınıñ meraqlarını qorçalağanı içün qanunsız taqip etilüvdir
Dava materiallarında maña ait olğan cinayetniñ doğru, obyektiv delilleri yoq.
Tahqiqat farazilerge esaslanır, ne motiv, ne de maqsatlarnı isbatlamay. Bu ise menim areketlerimde cinayet faaliyeti olmağanı kösterir.
Qabaatlav üç gizli şaatnıñ şaatlığına esaslanır. Olar ise acayip bir şekilde tam tahqiqat içün kerek olğan şeylerni "körgenler" ve "eşitkenler" .
İşğal etilgen Qırımdaki bütün serbest adamlarnı zorbalıqsız küreş usullarına ve printsiplerine riayet etmege çağıram
Qabaatlav tarafı bu siyasiy davanıñ figurantlarınıñ qabaatını isbatlamaq içün zamet etmeycek, çünki mahkeme ananeviy olaraq evelden azıranğan ükümni çıqaracaq.
Amma buña baqmadan men ve advokatlarım cididy tirenüvge azırlıq köremiz. Maqsadımız, kene Rusiye respresiv siyastemasınıñ tsinizminiñ, alçaqlığınıñ ve yalanınıñ üstüni açmaqtır.
İşğal etilgen Qırımdaki bütün serbest adamlarnı siyasiy basqılarğa: qanunsız tevqiflerge, cöremelerge, Nariman Ametovnen olğanı kibi iskencelerge baqmadan zorbalıqsız küreş usullarına ve printsiplerine riayet etmege çağıram.
Adalet quvetni yeñecek!
Nariman Celâl.
Qırımda apiske alınğan qırımtatar faali, siyasetçi ve jurnalist Nariman Celâlnıñ mektübini yanvarnıñ 18-nde advokat Nikolay Polozov Facebook saifesinde derc etti.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.