Qırımtatar faali ve siyasetçi Nariman Celâlğa qarşı dava onıñ «Qırım platformasında» iştirak etkeni içün uydurıldı. Bu aqta Ukrayına prezidentiniñ Qırım Muhtar Cumhuriyetindeki temsilciligi bildirdi.
«Nariman Celâlnıñ ömür arqadaşı Leviza hanımnıñ malümatına köre, iyülniñ 20-nde Aqmescitteki işğalci mahkemede Nariman Celâl şaatlıq etip, tutulğanını tafsilâtlıca tarif etti: mağazda tutuluvı, maneviy basqı ve qorquzuvlar aqqıda. Bundan ğayrı, işğalci uquq qoruyıcılar daa o vaqıt, 2021 senesi sentâbr ayında, tutuluvınıñ kerçek sebebi Meclis reisiniñ muavini olaraq «Qırım platforması» sammitinde iştirak etüvi ola, dep aytqan eken», – dep aytıla temsilcilikniñ haberinde.
Anda hatırlatqanlarına köre, Celâl Rusiye işğal etken Qırımda yaşağan ve Kyivdeki sammitte açıq iştirak etken qırımtatar halqınıñ yekâne vekili oldı. O, Qırımğa qaytqanından çoq vaqıt keçmegende tutuldı.
«Nariman em o, em dava şaatları işğalciler tarafından maneviy ve bedeniy basqığa oğratıla, qabaat esasnlanğan gizli şaatlarnıñ aytqanlarını ise yalan dep saya, çünki olarnı teşkermek imkânsız ola, dep bildirdi. Siyasiy mabüsniñ talaplarına baqmadan, advokat berilmedi, şübheli olaraq baqılsa da, şaat statusı aqqında aytıldı», – dep qoştı prezidentniñ temsilciligi.
İyulniñ 20-nde Rusiye kontrolindeki Qırım Yuqarı mahkemesinde imaye ve qabaatlav tarafları «gaz borusındaki diversiya davası» boyunca apiske alınğan qırımtatar faali ve siyasetçi Nariman Celâl sorğuğa çekildi. «Qırım statusınen bağlı fikrimni bir vaqıt gizlemedim, amma bir de bir qanunsız areket yapacaq edim demek degil», – dedi o, mahkemede.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.